Elimizdiń Ulttyq qaýipsizdik komiteti qyzmetshileri kózge kórinbes maidanda elimiz úshin abyroily jumys atqarýda. Búgin QR Ulttyq qaýipsizdik komitetiniń 25 jyldyq mereitoiyna arnalǵan merekelik kontsertte sóz sóilegen Qazaqstan Prezidenti Nursultan Nazarbaev osylai aitty, dep habarlaidy Ult.kz tilshisi QazAqparat agenttigine silteme jasap.
«Osydan týra shirek ǵasyr buryn meniń Jarlyǵymmen Qazaqstannyń Táýelsiz qaýipsizdik organdary quryldy. Barshańyzdy osy aitýly oqiǵamen, kásibi merekelerińizben shyn júregimmen quttyqtaý úshin keldim. Bizdiń elimizde mundai organdar tuńǵysh ret derbes quryldy dep aitýǵa bolady. Árine, buryn da bolǵan. Biraq ta biz anaý ortalyqtyń bir bólshegi ǵana edik. Jumysymyzdyń barlyǵy solarmen kelisip isteletin. Qazir Táýelsiz eldiń táýelsiz qaýipsizdik organdary bar. Táýelsizdik jyldarynda elimizdiń qaýipsizdigin qamtamasyz etetin berik júie qalyptasty. Sonyń ishinde ulttyq qaýipsizdik organdarynyń mańyzy óte zor dep aitýǵa bolady. Sizder Otanymyzdyń tutastyǵyn qamtamasyz etýge, táýelsizdikti nyǵaitýǵa jáne halqymyzdyń tynyshtyǵyn saqtaýǵa 25 jyldyń ishinde eleýli úlesterińizdi qosyp kele jatyrsyzdar. Sol úshin de rizashylyǵymdy bildiremin», - dedi Memleket basshysy.
Qazaqstan Prezidenti arnaýly qyzmettegi adamdardyń barlyǵy, sonyń ishinde ásirese ulttyq qaýipsizdik organdarynyń qyzmetshileri kózge kórinbes maidanda kúni-túni demei elimiz úshin abyroily, jaýapty jumys atqaryp kele jatqany basa aitty.
«Osy jyldar ishinde ulttyq qaýipsizdik organdary kóptegen qaýiptiń aldyn alyp, talai lańkestik áreketterdiń jolyn kesti. Men onyń barlyǵyn bilemin. Ulttyq qaýipsizdik organdaryna biliktiligi men daiarlyǵy joǵary adamdar ǵana qabyldanady. Daiyndyǵy bar, bilimi bar, sezimi bar, otansúigish júregi bar adamdar ǵana qabyldanady. Olarǵa alańsyz ári adal qyzmet úshin memleket tarabynan barlyq jaǵdai jasalýda», - dedi Nursultan Nazarbaev.
Sonymen qatar Elbasy qaýipsizdik qurylymdary aldynda turǵan mindetter asa mańyzdy bolǵandyqtan bul organnyń árbir qyzmetshisine jaýapkershilik, talap óte joǵary ekendigin atap ótti.
