Qazaqstan Prezidenti Nursultan Nazarbaev arnaiy málimdeme jasap, Saǵyntaev basqaratyn Úkimetti otstavkaǵa jiberdi, dep habarlaidy "Ult aqparat" Aqordaǵa silteme jasap.
Memleket basshysynyń málimdemesi
Qurmetti qazaqstandyqtar!
Men búgin elimiz úshin mańyzdy sheshim qabyldaǵaly otyrmyn.
Ótken jyldardaǵy áleýmettik-ekonomikalyq ahýal turaqty boldy.
Bul – árine, jaqsy kezeń.
Biraq, bul qazirgi ýaqyt talaby úshin jetkiliksiz.
Men usynǵan Úshinshi jańǵyrý jáne «100 naqty qadam – Ult jospary» qurylymdyq reformalardy jedel júzege asyrýǵa baǵyttaldy.
Bes institýtsionaldyq reformanyń tolyq iske asyrylýy shaǵyn jáne orta biznestiń úlesin túbegeili arttyrýǵa jáne ekonomikadaǵy memlekettik sektordyń úlesin azaitýǵa, bankterdi «tazartýǵa», sottarǵa jáne quqyq qorǵaý júiesine degen senimdi arttyrýǵa tiis.
Qabyldanǵan zańdarǵa, Úkimet sheshimderine qaramastan, ekonomikanyń kóptegen baǵyttary boiynsha oń ózgeristerge qol jetkizilmedi.
Ishki jalpy ónim negizinen shikizat resýrstary esebinen ósti.
Biraq, Úkimet pen Ulttyq bank el ekonomikasyn sapaly damytýǵa serpin beretin naqty quraldardy tolyqqandy jasap shyǵara almady.
Memlekettik baǵdarlamalardy júzege asyrý barysyna jasalǵan taldaý qorytyndysy olardyń oryndalyp jatqanyn kórsetkenimen, kóptegen mańyzdy baǵyttar boiynsha naqty nátijelerdiń joq ekenin ańǵartty.
Ónimdi jumys oryndary jetkilikti túrde ashylmai otyr. Bul ásirese aýyldyq jerlerge qatysty. Shaǵyn jáne orta biznes ósimniń qozǵaýshy kúshine jáne ony damytý isi ákimder men ministrlerdiń negizgi mindetine ainalmady.
Men turǵyndardyń tabysy men turmys sapasy árbir Úkimet múshesi men árbir ákimniń jumysyndaǵy negizgi basymdyq bolý kerek dep birneshe ret aittym.
Eki jyl buryn biz konstitýtsiialyq reforma júrgizdik. Osyǵan orai Úkimet ákimdermen birge áleýmettik-ekonomikalyq máselelerdi sheship, oǵan jaýap berý úshin barlyq tiisti ókilettik pen derbestikke ie boldy.
Indýstrialdy, áleýmettik, infraqurylymdyq damý, densaýlyq saqtaý jáne bilim berý salalaryn damytýǵa qatysty barlyq qajetti memlekettik baǵdarlamalar qabyldandy. Olardy júzege asyrý úshin qajetti qarjy bólindi.
Degenmen, júieli jumys júrgizilmedi. Turǵyndardyń naqty tabysy óspedi. Otbasylardyń biýdjetinde azyq-túlikke degen shyǵyn kólemi arta tústi.
Atqarýshy organdardyń salǵyrttyǵynan áleýmettik turǵydan az qamtylǵan turǵyndardyń bir bóligi ataýly áleýmettik kómekpen qamtylmaǵan.
Onyń ústine Úkimet músheleri, ministrler, ákimder halyqpen jumys istei almady, sondai-aq jurtshylyqtyń problemalaryna qulaq asyp, atqarylyp jatqan ister men saiasatty túsindirý jumystaryn júrgizýge shamasy kelmedi.
Bul rette, men el Prezidenti ári Konstitýtsiianyń kepili retinde halyqtyń múddesin eskere otyryp, mynadai sheshim qabyldadym.
Úkimet otstavkaǵa ketýge tiis dep sanaimyn.
Úkimettiń jańa basshylyǵy ómir súrý deńgeiin arttyrý, ekonomikany yntalandyrý, strategiialyq mindetterdi júzege asyrý jóninde naqty sharalar ázirleýge tiis.
Men «Nur Otan» partiiasynyń jaqynda ótetin sezinde áleýmettik qoldaýdy kúsheitýge jáne azamattardyń turmys sapasyn arttyrýǵa arnalǵan birqatar sharalar usynamyn. Buǵan biýdjetten jáne Ulttyq qordan qomaqty qarjy bólinetin bolady.
Bul qarajat mynadai mindetterdi sheshýge baǵyttalady:
1. Az qamtylǵan azamattarǵa áleýmettik qoldaý kórsetý isin kúsheitý.
2. Halyqtyń áleýmettik turǵydan álsiz toptarynyń baspana jaǵdaiyn jaqsartý múmkindikterin arttyrý.
3. Óńirlerdi damytý saiasatyn túbegeili ózgertý.
Úkimet pen barlyq deńgeidegi ákimderdiń jumysy osy mindetterdi júzege asyrýǵa baǵyttalýy tiis.
Úkimet pen óńirlerdiń ieligindegi qarajat kózdelgen maqsatqa sai jumsalmai otyr. Munyń bárine baqylaý ornatylady. Osy baǵyttar jóninde «Nur Otan» partiiasynyń sezinde tolyǵyraq aitylatyn bolady.
