Ministrler derbes sheshim qabyldaýda jaýapkershilikti moiyndaryna alýlary kerek. Bul týraly búgin Úkimettiń keńeitilgen májilisinde QR Prezidenti Nursultan Nazarbaev aitty, dep habarlaidy Ult.kz tilshisi QazAqparat agenttigine silteme jasap.
«Árbir basshy jaýapkershilikti syrǵytpai óz moinyna alýy kerek. Biz bul týraly ana jyly Úkimetti qaita uiymdastyrǵanda aitqanbyz. Vitse-premerler, ministrler sanyn qysqartqanda aittyq. Ár ministr ózi buiryq shyǵarady, ózi sony oryndaidy, ózi jaýap beredi. Biýdjetke qazirden bastap kirisesińder, ár ministrlikke, ár óńirge aqsha bólinedi. Sony alamyz dep tyrmysyp qanshama jumys istep, dáleldedińder, aldyńdar. Endi sonyń bárin alyp uqsatyńdar, jetkizińder. Sodan keiin jaýap berińder. Másele sonda. Jaýapkershilik sondai. Biraq, qarap otyrsań, Abai aitqandai «Baiaǵy jartas, bir jartas». Báribir ministrler keledi de Premer-Ministrge hat jazady, maǵan jazady. Vitse-premerler bar, olarǵa hat jazady. Ózine jaýapkershilik almaidy. Ondai qorqaq bolsańdar mundai jumysqa nege kelesińder? Basqa jerge baryńdar. Qaǵazǵa qol qoimaityn jumystar bar, orynbasarlar bar. Bizneske baryńdar», - dedi Elbasy Úkimet múshelerine qarata.
Sonymen qatar Qazaqstan Prezidenti ministrler derbes sheshim qabyldaýdan jasqanbaýy, jaýapkershilikti moiyndaryna alýy qajettigin basa aitty.
«Eń birinshi maqsat memleket maqsat-múddesin basshylyqqa alyp, sony oryndaý. Bul jóninde, úshinshi jańǵyrý jónindegi Joldaýda atalǵan maqsattarǵa qalai qol jetkizý kerektigin aityp berdim», - dedi Nursultan Nazarbaev.
