QR Prezidenti Nursultan Nazarbaev Aqordada Túrkimenstannyń basshysy Gýrbangýly Berdimuxamedovti qabyldady. Saltanatty sharadan keiin prezidentter shaǵyn quramda kezdesip, ózara pikir almasty, dep xabarlaidy QazAqparat tilshisi.
"25 jyldyń ishinde bizdiń aramyzda sheshilmegen másele bolmaǵan. Qazaqstan men Túrkimenstan arasyndaǵy qarym-qatynas qalai ornady, solai damyp keledi. Syrtqy saiasat jaǵynan da yntymaqtastyq bar. Biz Túrkimenstannyń xalyqaralyq bastamalaryn únemi qoldap otyramyz. Túrkimenstan da bizdiń bastamalarymyzdy qoldap keledi. Eki jaqty iri jobalardyń biri - "Qazaqstan-Túrkimenstan-Iran" temirjoly. Jibek jolynyń baǵyty deýge bolady. Atalǵan másele mamyrdyń 15-si kúni Beijińde ótetin "Bir beldeý-bir jol" atty úlken forýmda da talqylanady. Ony basty marshrýt retinde qarastyryp jatyr. Bizdiń endigi maqsatymyz - osy joldy barynsha toltyrý. Búgin biz basqa da mańyzdy máselelerdi talqylap, ekijaqty yntymaqtastyqty nyǵaitatyn birqatar qujattardy rásimdeimiz", - dedi N.Nazarbaev.
Óz kezeginde Túrkimenstan prezidenti Berdimuxamedov ata-babalardan beri kele jatqan ózara dostyq pen tatýlyqtyń myzǵymas dástúrinen bastap, beibitshilikti tý etken eki eldiń qazirgi kózqarasy ortaq ekenin jetkizdi.
"Túrkimenstan men Qazaqstannyń xalyqaralyq arenadaǵy ustanymy da uqsas. Biz beibitshilik pen turaqtylyqtyń aimaqtyq dárejede ǵana emes, barsha álemde ornaǵanyn qalaimyz. BUU bolsyn, EYQU bolsyn, biz "ashyq esik" saiasatyn júrgizip kelemiz. Osy oraida Sizge de, Nursultan Ábishuly, óz alǵysymdy jetkizeiin dep edim. Sebebi Siz bizdiń bastamamyzdy qoldap qana qoimai, óz úlesińizdi de qostyńyz. Endi, 12 jeltoqsan - Halyqaralyq beitaraptyq kúni retinde jariialandy. Biz de Qazaqstannyń BUU Qaýipsizdik Keńesindegi bastamalaryn qýana-qýana qoldaimyz. Osylaisha, eki el de beibitshilik pen turaqtylyqty qalaitynyn kórsetip keledi", - dep atap kórsetti Túrkimenstannyń basshysy.
