Latyn álipbii túrki áleminiń ortaq júiesin qalyptastyrady. Bul týraly Túrki tildes memleketter yntymaqtastyǵy keńesiniń beiresmi sammitinde Túrki keńesiniń qurmetti tóraǵasy Nursultan Nazarbaev málim etti, dep habarlaidy "Ult aqparat".
«Biz mádeni-gýmanitarlyq damýmen birge bir-birimizden kóp nárse úirene alamyz. Latyn álipbiin qoldaný ortaq júie qalyptastyrýǵa múmkindik beredi. Sonyń arqasynda biz jastardy jahandyq deńgeide damytýǵa múmkindik alamyz», - dedi Elbasy.
Sonymen qatar Nazarbaev kornavirýs pandemiiasynyń saldaryna toqtalyp, álem elderi qiyndyqtarǵa tap bolǵanyn atap ótti.
«Koronavirýs áli taralyp jatyr. Ótken jyly pandemiiadan kelgen shyǵyn 8,5 trillion dollardy qurady. 800 million adam san alýan qiyndyqqa tap boldy. Buǵan deiin daǵdarystar boldy. Alaida pandemiianyń saldary áldeqaida qatty bolyp tur», - dep atap kórsetti Nazarbaev.
Sammit barysynda QR Tuńǵysh Prezidenti ózin Túrki keńesiniń qurmetti tóraǵasy retinde sailaǵany úshin uiymǵa múshe elderdiń basshylaryna alǵysyn aitty.
Aita keteiik, Túrki tildes memleketter yntymaqtastyǵy keńesiniń beiresmi sammitin Túrkistan qalasynda ótkizý josparlanǵan bolatyn. Alaida pandemiiaǵa bailanysty is-sharany onlain rejimde uiymdastyrýǵa sheshim qabyldandy. Sammit kezinde uiymǵa múshe Qazaqstan, Túrkiia, Ázerbaijan, Qyrǵyzstan men Ózbekstan prezidentteri sóz sóilep, óz oilaryn ortaǵa saldy. Al Majarstan baqylaýshy mártebesine ie. Osy jolǵy sammitke Túrikmenstan prezidenti Gýrbangýly Berdimuhamedov ta qurmetti qonaq retinde qatysyp otyr.
Sammit qorytyndysy boiynsha túrki elderiniń mádeni qundylyqtary men keńestiń mártebesi boiynsha birlesken deklaratsiia qabyldanady.
