Qazaqstan Prezidenti Nursultan Nazarbaev pen AQSh Prezidenti Donald Tramptyń Aq úidegi kezdesýi.
Qazaqstan Respýblikasynyń Prezidenti Nursultan Nazarbaev Aq úide Amerika Qurama Shtattarynyń Prezidenti Donald Tramppen kezdesti, dep habarlaidy "Ult aqparat". Kezdesý barysynda memleket basshylary ekijaqty strategiialyq áriptestikti nyǵaitý, óńirdegi qaýipsizdik jáne ekonomikalyq bailanys máseleleri tóńireginde sóz qozǵady.
«Eń aldymen, arnaiy shaqyrtýyńyz úshin erekshe alǵys bildirgim keledi, Prezident myrza. Múmkindikti paidalana otyryp, Sizdi AQSh Prezidenti qyzmetine kiriskenińizge bir jyl tolýymen jáne osy ýaqyt aralyǵynda el ekonomikasyn órkendetýde tabysty jumys atqarýyńyzben quttyqtaimyn. Ortalyq Aziiadan Aq úige arnaiy shaqyrylǵan tuńǵysh Prezident bolýym - sózsiz, úlken abyroi. Al Qazaqstan úshin AQSh-tyń árdaiym el Táýelsizdigi men shekaramyzdyń tutastyǵyn qoldaýy mańyzdy. 26 jyl boiy qos memleket arasynda berik dostyq ornady. Qos tarap áli de ózekti taqyryptar tóńireginde pikirlesip, negizgi máselelerge qatysty naqty sheshimderge keledi dep oilaimyn. Sonymen qatar, ekijaqty ekonomikalyq qatynastardyń jańa deńgeige kóteriletinine senemin», - dedi Nursultan Nazarbaev kezdesý barysynda.
«Meniń shaqyrtýymdy qabyl alǵanyńyz úshin asqan rizashylyǵymdy bildiremin. Aq úide Sizdi qabyldaý - biz úshin de úlken abyroi. Buǵan deiin Saýd Arabiiasynda birqatar máselelerdi talqylaǵan edik. Sózsiz, Qazaqstan táýelsizdik alǵaly beri kóptegen jetistikterge qol jetkizdi. Al, AQSh ekonomikasy búgingi tańda úlken bir belesti baǵyndyryp otyr», - dedi AQSh Prezidenti óz kezeginde.
Odan soń jumys tártibindegi túski astyń aldynda eki prezident Rýzvelt zalynda jýrnalisterdiń aldyna shyǵyp, shaǵyn baspasóz máslihatyn da ótkizdi.
Qazaqstan prezidenti AQSh-qa sapary kezinde amerikalyq kompaniialarmen jalpy quny 7,5 mlrd AQSh dollary bolatyn kommertsiialyq kelisimderge qol qoiylatynyn aitty. Nazarbaevtyń sózinshe, Qazaqstan AQSh-tan "Boing" ushaqtary men 900-dei lokomotiv satyp almaqshy.
Bul - Elbasynyń jańa ákimshilik iske kiriskeli beri Vashingtonǵa jasaǵan tuńǵysh sapary. Budan buryn Nursultan Nazarbaev pen Donald Tramp Er-Riiadta ótken «Islam álemi - AQSh» sammitinde tildesip, odan keiin de telefon arqyly sóilesken bolatyn.
Shaǵyn quramdaǵy kelissózderden keiingi press-konferentsiia
Donald Tramptyń Qazaqstan Prezidenti Nursultan Nazarbaevty kútip alǵan sáti
Eske sala keteiik, 2017 jylǵy qyrkúiekte Donald Tramp telefon arqyly Nursultan Nazarbaevty AQSh-qa sapar jasaýǵa shaqyrǵan bolatyn.
2018 jyldyń 9 qańtarynda QR-daǵy AQSh elshisi Djordj Krol Memleket basshysymen kezdesýde Qazaqstan Prezidentiniń aldaǵy sapary eki memleket arasyndaǵy bailanysty odan ári nyǵaita túsetinine senim bildirgen edi.
Resmi sapar aiasynda Nursultan Nazarbaevtyń AQSh-tyń resmi jáne isker toptar ókilderimen kezdesýi josparlanǵan. Sonymen qatar, Memleket basshysy BUU Qaýipsizdik Keńesiniń otyrysyna qatysady.
Aita keteiik, sońǵy márte Nazarbaev Aq úide resmi saparmen 2006 jyly bolǵan edi.
Ult portaly
