Qazaqstanda endi «Qurmetti senator» ataǵy eshkimge berilmeidi. Bul týraly Senat tóraǵasy Máýlen Áshimbaev málimdedi, dep habarlaidy "Ult aqparat".
«Osydan eki-úsh apta buryn Senat reglamentine tiisti ózgerister engizildi. Sonyń aiasynda biz reglamentten «Qurmetti senator» ataǵyn alyp tastadyq. Endi bizde «Qurmetti senator» degen institýt joq. 2022 jyly ótken referendýmda búkil halyq qoldap, Konstitýtsiiadan Elbasyǵa qatysty normalar alynyp tastaldy. Bul - halyqtyń sheshimi. Erteń Tuńǵysh Prezident – Elbasy týraly zań kúshin (Parlament palatalarynyń birlesken otyrysynda) joiady», - dedi Áshimbaev Senattyń jalpy otyrysynan keiin tilshiler suraǵyna jaýap bere oltyryp.
Foto: senate.parlam.kz
Spikerdiń aitýynsha, bul dáreje bir adamǵa ǵana berilgen. Biraq ataq zańmen bekitilmegen, tek Senattyń reglamentine ǵana engizilgen.
«Endi zańdarda «Qurmetti senator» degen ataq joq. Birden aita keteiin, kezinde Senat reglamentine osy ózgeris engizilgen. Biz bul normany qaita qarap, ózgertkende «Qurmetti senator» ataǵyn alyp tastadyq. Buǵan deiin ol tek bir adamǵa (Nursultan Nazarbaevqa – red.) berilgen edi. Endi mundai ataq eshkimge berilmeidi. Óitkeni bizde qazir ondai quqyqtyq negiz joq, alyp tastadyq», - dep túsindirdi ol.
Osy oraida tilshiler: "Sonda Nazarbaev bul ataqtan aiyryldy ma?", - dep surady.
«Alyp tastadyq qoi ol ataqty, sondyqtan ondai ataq qazir joq, ondai ataq bolmaidy. Túsinikti ǵoi barlyǵy», - dedi palata tóraǵasy.
