Memleket basshysy Nursultan Nazarbaev Petropavl qalasynyń jurtshylyǵymen kezdesti. Kezdesý barysynda Soltústik Qazaqstan oblysynyń ákimi Qumar Aqsaqalov óńirdiń biylǵy 9 aidaǵy áleýmettik-ekonomikalyq damý qorytyndysyn baiandady, dep habarlaidy QazAqparat.
Oblys ákimdigi baspasóz qyzmetiniń málimetinshe, birinshi jartyjyldyq nátijesinde ekonomikanyń negizgi kórsetkishterinde ońtaily qarqyn qamtamasyz etilgen. 9 aida ekonomika ósimi 5,3 paiyzǵa jetse, qurylys jumystarynyń kólemi 40 paiyzǵa artty.
Taratylǵan málimetterge qaraǵanda, aýyl sharýashylyǵyna investitsiia tartý turǵysynda soltústik óńir kósh bastady. Agrarlyq sektorǵa 60 mlrd teńgeden astam investitsiia tartyldy.
Jalpy, 2018 jyldyń qorytyndysy boiynsha oblysqa 218 mlrd teńge kóleminde investitsiia tartylady dep kútilýde. Aǵymdaǵy jyly SQO-da 5,3 mln tonna astyq bastyryldy, ortasha astyq shyǵymdylyǵy gektarynan 19 tsentnerge jetti.
Sonymen qatar Qumar Aqsaqalov Memleket basshysyna oblysta júzege asyrylyp jatqan birqatar iri jobalar týraly esep berdi.
Óńir basshysynyń esebin tyńdaǵannan keiin, Nursultan Nazarbaev oblys jaqsy qarqynmen damyp kele jatqandyǵyn atap ótti.
«Sizderde iri zaýyttar ornalasqan, qorǵanys ónimderi, azamattyq taýarlar qamtylyp otyr. Barlyǵy jaqsy deńgeide. Aýyl sharýashylyǵy ónimderin qaita óńdeýge ekpin qoiý kerek. Osy oraida óńdeý kólemin arttyryp, et pen sút eksportyna nazar aýdarý qajet», - dedi Elbasy.
Prezident búgingi Forýmǵa daiyndyq aiasynda Petropavl qalasy aitarlyqtai túrlengenin atap ótti.
Budan buryn habarlanǵandai, QR Prezidenti Nursultan Nazarbaev pen RF Prezidenti Vladimir Pýtin Petropavldaǵy Qazaqstan men Reseidiń Óńiraralyq yntymaqtastyǵynyń XV forýmy aiasyndaǵy kórmeni aralap kórdi.
