مەملەكەت باسشىسى نۇرسۇلتان نازارباەۆ پەتروپاۆل قالاسىنىڭ جۇرتشىلىعىمەن كەزدەستٸ. كەزدەسۋ بارىسىندا سولتٷستٸك قازاقستان وبلىسىنىڭ ەكٸمٸ قۇمار اقساقالوۆ ٶڭٸردٸڭ بيىلعى 9 ايداعى ەلەۋمەتتٸك-ەكونوميكالىق دامۋ قورىتىندىسىن باياندادى, دەپ حابارلايدى قازاقپارات.
وبلىس ەكٸمدٸگٸ باسپاسٶز قىزمەتٸنٸڭ مەلٸمەتٸنشە, بٸرٸنشٸ جارتىجىلدىق نەتيجەسٸندە ەكونوميكانىڭ نەگٸزگٸ كٶرسەتكٸشتەرٸندە وڭتايلى قارقىن قامتاماسىز ەتٸلگەن. 9 ايدا ەكونوميكا ٶسٸمٸ 5,3 پايىزعا جەتسە, قۇرىلىس جۇمىستارىنىڭ كٶلەمٸ 40 پايىزعا ارتتى.
تاراتىلعان مەلٸمەتتەرگە قاراعاندا, اۋىل شارۋاشىلىعىنا ينۆەستيتسييا تارتۋ تۇرعىسىندا سولتٷستٸك ٶڭٸر كٶش باستادى. اگرارلىق سەكتورعا 60 ملرد تەڭگەدەن استام ينۆەستيتسييا تارتىلدى.
جالپى, 2018 جىلدىڭ قورىتىندىسى بويىنشا وبلىسقا 218 ملرد تەڭگە كٶلەمٸندە ينۆەستيتسييا تارتىلادى دەپ كٷتٸلۋدە. اعىمداعى جىلى سقو-دا 5,3 ملن توننا استىق باستىرىلدى, ورتاشا استىق شىعىمدىلىعى گەكتارىنان 19 تسەنتنەرگە جەتتٸ.
سونىمەن قاتار قۇمار اقساقالوۆ مەملەكەت باسشىسىنا وبلىستا جٷزەگە اسىرىلىپ جاتقان بٸرقاتار ٸرٸ جوبالار تۋرالى ەسەپ بەردٸ.
ٶڭٸر باسشىسىنىڭ ەسەبٸن تىڭداعاننان كەيٸن, نۇرسۇلتان نازارباەۆ وبلىس جاقسى قارقىنمەن دامىپ كەلە جاتقاندىعىن اتاپ ٶتتٸ.
«سٸزدەردە ٸرٸ زاۋىتتار ورنالاسقان, قورعانىس ٶنٸمدەرٸ, ازاماتتىق تاۋارلار قامتىلىپ وتىر. بارلىعى جاقسى دەڭگەيدە. اۋىل شارۋاشىلىعى ٶنٸمدەرٸن قايتا ٶڭدەۋگە ەكپٸن قويۋ كەرەك. وسى ورايدا ٶڭدەۋ كٶلەمٸن ارتتىرىپ, ەت پەن سٷت ەكسپورتىنا نازار اۋدارۋ قاجەت», - دەدٸ ەلباسى.
پرەزيدەنت بٷگٸنگٸ فورۋمعا دايىندىق اياسىندا پەتروپاۆل قالاسى ايتارلىقتاي تٷرلەنگەنٸن اتاپ ٶتتٸ.
بۇدان بۇرىن حابارلانعانداي, قر پرەزيدەنتٸ نۇرسۇلتان نازارباەۆ پەن رف پرەزيدەنتٸ ۆلاديمير پۋتين پەتروپاۆلداعى قازاقستان مەن رەسەيدٸڭ ٶڭٸرارالىق ىنتىماقتاستىعىنىڭ XV فورۋمى اياسىنداعى كٶرمەنٸ ارالاپ كٶردٸ.
