Qazaqstannyń Tuńǵysh Prezidenti Nursultan Nazarbaev Shymkent qalasynda meditsinalyq qural-jabdyqtar, meditsinalyq jihazdar men meditsinalyq kólikter shyǵaratyn kásiporynda boldy, dep habarlaidy "Ult aqparat".
Elbasynyń resmi saitynda málim etilgendei, 2013 jyldan bastap qazirgi ýaqytqa deiin «Kazmedpribor» JShS 15 myńnan astam meditsinalyq qural-jabdyq, 120 myńnan astam meditsinalyq jihaz ben 742 jedel járdem kóligin jasap shyǵardy. Kásiporyn 2005 jyly qurylǵan.
Shymkent qalasynyń ákimi M.Áitenov Elbasyǵa jeke investordyń qarajatyna salynatyn 1000 oryndyq kópsalaly ýniversitettik aýrýhana qurylysy týraly aqparat berdi. Jańa meditsinalyq mekemede ana men bala ortalyǵy, hirýrgiialyq, terapevtik ortalyqtar, sonymen qatar bir aýysymda 700 adamǵa qyzmet kórsetetin klinikalyq-diagnostikalyq ortalyq jumys isteitin bolady dep josparlanyp otyr.
Sondai-aq «Samuryq-Qazyna» aktsionerlik qoǵamynyń basqarma tóraǵasy A.Esimov pandemiia kezinde ulttyq ál-aýqat qory tarapynan densaýlyq saqtaý júiesi men otandyq óndirýshilerdi qoldaý úshin qabyldanǵan sharalar týraly aitty. Sonymen qatar Nursultan Nazarbaevqa elorda men Almatyda meditsinalyq ortalyqtar salý jónindegi tapsyrmanyń oryndalý barysy baiandaldy.
A.Esimov Elbasyna 3000 dana kóleminde «Avifavir» dárisin satyp alý jáne koronavirýsqa qarsy vaktsina jetkizý boiynsha jasalǵan kelisim týraly málimet berdi.
«Kazmedpribor» JShS shyǵaratyn negizgi ónim túrleri: meditsinalyq mashinalar; ókpeni jasandy jolmen tynystandyratyn apparattar (týrbinalyq, neonataldyq, portativtik); patsientterge arnalǵan monitorlar; elektrokardiografiia apparaty; zerthanalyq shkaf; fýnktsionaldy kereýetter jáne t.b.
Óndiristik qýat kólemi: meditsinalyq qural-jabdyq – jylyna 50 myń dana; meditsinalyq jihaz – jylyna 150 myń dana; meditsinalyq kólik – jylyna 1000 dana. Sonymen qatar ónimniń jańa túrleri – ókpeni jasandy jolmen tynystandyratyn týrbinalyq apparat, jańa týǵan nárestelerge arnalǵan inkýbator, jańa týǵan nárestelerge arnalǵan ókpeni jasandy jolmen tynystandyratyn apparattar shyǵarady. Qazaqstandyq qamtý úlesi 51,2-ten 98 paiyzǵa deiin.
