Qazaqstannyń Tuńǵysh Prezidenti - Elbasy Nursultan Nazarbaev Shveitsariia Prezidenti Ýli Maýrermen kezdesti, dep habarlaidy QazAqparat elbasy.kz silteme jasap.
Kezdesý barysynda Nursultan Nazarbaev táýelsizdik jyldarynda Qazaqstan men Shveitsariia arasynda ekonomikanyń túrli salalarynda jaqsy qarym-qatynas qalyptasqanyn atap ótti.
– Qazaqstanǵa qosh keldińiz. Sizderdiń elderińizge birneshe ret bardym. Shveitsariia – Qazaqstannyń iri jáne mańyzdy saýda seriktesteriniń biri. Bizdiń elimizdi árqashan qoldap kelesizder. Osy yntymaqtastyqty odan ári jalǵastyrǵan jón. Bizde shveitsariialyq biznesti qyzyqtyratyn jobalar kóp, - dedi Qazaqstannyń Tuńǵysh Prezidenti.
Óz kezeginde Ýli Maýrer Nursultan Nazarbaevqa kezdesý úshin rizashylyq bildirip, Qazaqstanǵa jasap jatqan resmi saparynan alǵan áserimen bólisti.
– Bizdiń elderimizdiń qarym-qatynasy óte jaqsy. Búgin tańerteń mazmundy ári jemisti kezdesýler ótkizdim. Qazaqstanmen birlese otyryp damytatyn kóptegen jobalardy talqyladyq, - dedi Shveitsariia Prezidenti.
