QR Prezidenti Nursultan Nazarbaev sheteldegi qarjyny qaitarýǵa qatysty arnaiy zańnamany ázirleýdi tapsyrdy. Atalǵan mindet Úkimet basshysy Baqytjan Saǵyntaevqa júkteldi, dep habarlaidy "Ult aqparat".
«Osy ýaqytqa deiin biz aqshany zańdastyrýdy úsh ret ótkizdik. Eshkimge tiispeimiz dedik. Solai boldy. Bir adamdy jaýapqa tarttyq pa? Bireýdiń astyn qazbaladyq pa? Joq, eshkimge tiisken joqpyz. Qazirgi jaǵdaida sizder shekaranyń arǵy jaǵynda ustap otyrǵan aqshalaryńyzdan aiyrylasyzdar! Ózderiniz sezip jatqan bolarsyz. Sanktsiialyq soǵys qyzyp tur. Ondaida sizderge eshkim kómektese almaidy. Aqshany Qazaqstanǵa qaitaryńdar da, osynda ustańdar! Qandai kepildik kerek? Men tiisti zańdardy da, jarlyqtardy da shyǵaryp beremin. Olai istemeimin deseńder, biz ózimiz isteimiz. Artynan renish bolmasyn», - dedi Nursultan Nazarbaev búgin Indýstriialandyrý kúnine arnalǵan jalpyulttyq telekópir kezinde.
«Biz júrgizip otyrǵan saiasattyń jáne naryqtyq jaǵdaidy qalyptastastyrýdyń arqasynda elimizde aýqatty da bai azamattar paida boldy. Men de Qazaqstanda dáýletti azamattardyń bolǵanyn qaladym. Alaida qazirgi tańda olar Qazaqstandaǵy kapitalyn syrtqa shyǵaryp, ony sonda saqtaýda. Olar tiimsiz nemese kúmán týǵyzatyn eksporttyq-importtyq kelisimder arqyly kapitaldy syrtqa shyǵaryp otyr. Bul adamdy aldaý ǵoi. Qarjy salasyndaǵy zańnamalar kelisimsharttar arqyly kúrdeli is-áreketter jasaýǵa múmkindik beredi. Osylaisha, olar jaýapkershilikten uzaq jyldarǵa bosatylady. Búginde 27 myń syrtqy ekonomikalyq kelisim-shart boiynsha 7,7 mlrd dollar qaryz bar. Oǵan 2 jyldan astam ýaqyt boldy. Zań buǵan shekteý qoia almaidy», — dep, óz oiyn naqtylady.
Prezidenttiń aitýynsha, búginde 18 otandyq kompaniia 12,5 mlrd dollardy shetelde ustap otyr. Atap aitqanda, «Teńiz Shevroil» kompaniiasy - 4,5 mlrd dollar, «QazMunaiGaz» ulttyq kompaniiasy - 3 mlrd dollar, «QazMunaiGaz barlaý men óndirý» kompaniiasy - 2 mlrd dollar, «Aziia gaz qubyry» JShS - 1 mlrd-tan astam, «Beineý-Shymkent» gaz qubyry» JShS - 100 mln dollar, budan bólek, «Shyǵys Tsement», «Jaiyq Munai», Kaspii qubyry konsortsiýmy jáne taǵy basqa kompaniialar shetelde qyrýar qarajatty ustap keledi.
«Nege olai isteisizder? Qazaqstannyń resýrstaryn satyp, aqsha tabasyzdar? Al tabysty shetelde ustaisyzdar. Nege ol aqsha osynda ainalyp, el ekonomikasyna jumys istemeidi? Jarty jyldyń ishinde memleketke qarasty kompaniialar sheteldegi qarjysyn 2 mlrd dollardan 6 mlrd-qa deiin ulǵaitty. Sizder neni kútip otyrsyzdar?! Men osyny túsinbeimin», - dep atap kórsetti Prezident.
Osy oraida Elbasy árbir kompaniia basshysymen jeke-jeke sóilesýdi tapsyrdy. Úkimet basshysy Baqytjan Saǵyntaevqa atalǵan olqylyqtardy joiý úshin tiisti zań daiyndaýǵa tapsyrma berdi.
«Baqytjan Ábdiruly, erteńnen bastap olardy (túrmege – avtor) otyrǵyzatyn, (aqshany – avtor) qaitaratyn zańdy daiyndai berińizder. Aqshany qaitarmasa, men olarmen basqasha sóilesemin. Osyny búkil Qazaqstannyń aldynda eskertip qoiaiyn. Biz ol aqshany qaitarýdyń jolyn tabamyz. Biraq ol kezde sizder bolmaisyzdar. Sizderge jaman bir nárse isteimiz dep otyrǵan joqpyn. Memleket sizderge aqsha jasaýǵa jaǵdai jasady. Sizder bolsa, ol aqshany memleketten tyǵyp otyrsyzdar. Olai bolmaidy. Jetedi osymen», - dedi Nursultan Ábishuly.
