Qazaqstan prezidenti Nursultan Nazarbaev úkimettiń jumysyn synǵa aldy, dep habarlaidy Sputnik Qazaqstan tilshisi.
Prezident ekonomikaǵa tiimdi jobalar men básekege qabiletti kásiporyndar kerek ekenin atap ótti. Aitýynsha, tek sońǵy úsh jylda bankrottyqtyń aldynda turǵan kásiporyndar sany shamamen 2 esege ósken.
"Bank aqsha bermeidi dep shýlaisyńdar, al ol kimge beredi? Barlyq jerde kásiporyndar bankrot. Eshkim kepildik bere almaidy, eshkim aqshany qaitara almaidy. Kimge beredi, qaitaryp beretin adamdar joq. Qazir osy bereshek 4 trillion teńgeden asady", — dedi Nazarbaev úkimettiń keńeitilgen otyrysynda.
Elbasy qarjy júiesin mysalǵa keltirdi.
"Máselen, bank qurylady, jumys istei bastaidy, adamdar senip, aqshasyn saqtaidy. Kvazimemlekettik sektor aqshasyn quiady. Sodan keiin aktsionerler sol aqshany shetelge shyǵaryp, urlai bastaidy. Bizde olardy túrmege qamaityn zań joq. Búkil álemde solai. Bári qashyp ketedi, biz artynan júgiremiz", — deidi memleket basshysy.
Nazarbaev Ulttyq bank pen úkimetke aktsionerlerdiń óz bankin tonap, qashyp ketpeýin qadaǵalaýdy tapsyrdy.
"Bankrottyq institýty naryqtyq elderde keń taralǵan qubylys. Sender ministr emes, bar bolǵany qorqaqsyńdar. Aiaq-qoldaryń dirildep, sheshim qabyldai almaisyzdar?
Sonda ne úshin jumys istep júrsińder? Barlyq bankterdi tazartyńdar, sonda men bul úkimet óz mindetin adal oryndady dep sanaimyn, sosyn osymen otstavkaǵa ketińder. Mine, sonda bul naǵyz jumys bolady", – dep ashýlandy prezident.
"Bárimiz birdeńe jasap júrgendei qol silteimiz, biraq naqty jumys joq. Premer-ministr jeke baqylaýyna alsyn. Bul máseleni sheshsin. Men "ketińder" dep jai aittym. Eshqaida ketpeńder, jumystaryńdy istep, baiandańdar", — dep túiindedi Nazarbaev.
