Astanada Qazaqstan men Resei óńiraralyq yntymaqtastyq forýmy aiasynda ótip jatqan biznes-forýmda Prezident Nursultan Nazarbaev reseilik kásipkerlerge el ekonomikasyn ártaraptandyrý, investitsiialyq ahýaldy jaqsartý úshin qolǵa alynǵan is-sharalardy aityp berdi, dep habarlaidy Baq.kz tilshisi.
«Qazaqstan ekonomikasyn ártaraptandyryp, investitsiialyq ahýaldy jaqsartý baǵytynda qarqyndy jumys jasap jatyr. Eldiń ekonomikasyna tartylǵan tikelei sheteldik investitsiia kólemi sońǵy 15 jylda 260 mlrd AQSh dollaryn qurady. Osy qarajat esebinen ekonomikada jaqsy ósim boldy. Dúniejúzilik banktiń biznesti júrgizýdegi jeńildik boiynsha Qazaqstan 41-shi orynda tur. Biz ekonomikany modernizatsiialaýdy jalǵastyryp jatyrmyz», - dep atap ótti Prezident.
Memleket basshymy «100 qadam» Ult jospary, «Qazaqstan-2050» strategiialyq baǵdarlamasy boiynsha aýqymdy jumys josparlanǵanyn aita kele, Qazaqstannyń álemniń damyǵan otyz eliniń qataryna qosylýdy kózdep otyrǵanyn eske salyp ótti.
«Investitsiialyq klimat jaqsaryp keledi. Indýstriialyq-innovatsiialyq damý baǵdarlamasy boiynsha basymdyq berilgen salalarda investorlar korporativtik tabys, 10 jylǵa jer, 8 jylǵa múlik salyǵyn tóleýden bosatylǵan. Kelisimderdiń turaqtylyǵyna kepildik beremiz. Investitsiialar jáne damý ministrligi barlyq sheteldik investorlar úshin «bir tereze» qaǵidasy boiynsha jumys isteidi. Sondai-aq, 37 memlekettiń elderi úshin vizalyq kedergiler joiyldy. Kelesi jyldan bastap bul tizim 56 elge deiin keńeitiledi», - dedi N.Nazarbaev.
Budan bólek, Prezident óz sózinde biylǵy jyly EAEO-nyń jańa kedendik kodeksin ázirleý aiaqtalatynyn atap ótti.
«Ol bizdiń elder arasyndaǵy barlyq kedendik rásimderdi aitarlyqtai jeńildetedi. Biryńǵai kólik keńistigin kezeń-kezeńimen qurý boiynsha kelisimge keldik», - dedi Elbasy.
Sondai-aq, óndirýshiler men investorlar úshin maqsatty túrde ortaq erejeler jasalyp jatyr.
«Qazaqstan ekonomikasyna qarajat salǵan reseilik biznes óz úiindegidei jaǵdaida bolady dep aitýǵa bolady. Biz muny qamtamasyz etemiz», - dedi N.Nazarbaev.
Aita ketsek, Qazaqstan men Reseidiń óńiraralyq yntymaqtastyq forýmy 2003 jyldan bastap ótkizilip keledi. 2015 jyly Sochide ótken forým «Agroónerkásiptik keshen salasyndaǵy yntymaqtastyq jáne azyq-túlik qaýipsizdigin qamtamasyz etý» taqyrybyn arqaý etken edi.
Qazirgi kezde Qazaqstanda reseilikterdiń qatysýymen 6453 kompaniia jumys istep jatyr. Olar munai men gaz óndirý, óńdeý ónerkásibi, kólik, bailanys, mashina jasaý, ǵarysh, atom energiiasyn beibit maqsatta paidalaný siiaqty salalarda ashylǵan.
Resei Qazaqstannyń eń iri saýda áriptesi bolyp tabylady. Kórshiles elder arasyndaǵy taýar ainalymy 2015 jyldyń qorytyndysy boiynsha 14,57 mlrd AQSh dollaryn qurady, onyń ishinde eksport - 4,34 mlrd, import - 10,23 mlrd AQSh dollary.
.jpeg)