Memleket basshysy Premer-Ministrdiń orynbasary Asqar Jumaǵalievti qabyldady, dep habarlaidy "Ult aqparat" Aqordaǵa silteme jasap.
Kezdesýde Memleket basshysyna «Tsifrlyq Qazaqstan» memlekettik baǵdarlamasynyń iske asyrylý barysy jáne buǵan deiin berilgen tapsyrmalardy oryndaý úshin atqarylǵan sharalar jóninde baiandaldy.
– Tsifrlandyrýdyń arqasynda Qazaqstan ekonomikasy 30 paiyzǵa ósýi kerek, ol aqshaǵa shaqqanda 2 trillion teńgeden asady, – dedi Qazaqstan Prezidenti.
Nursultan Nazarbaev Qazaqstanda jinaqtalǵan tájiribe men quzyrettilikti saqtaý úshin tsifrlandyrý salasyndaǵy memlekettik tapsyrystardy júzege asyrý máselelerin saralaýǵa otandyq biznestiń qatysýy qajet ekenin atap ótti.
– Tsifrlandyrý baǵdarlamasy bekitildi. Memleket oǵan az aqsha bólip otyrǵan joq, sondyqtan olardyń tiimdi paidalanylýyn qamtamasyz etý kerek, – dedi Memleket basshysy.
Asqar Jumaǵaliev Qazaqstan Prezidentine «Tsifrlyq Qazaqstan» baǵdarlamasynyń oryndalýynan kútiletin nátijeler jóninde málimdedi.
– Tsifrlandyrýdy engizýdiń arqasynda óndirýshi ónerkásipte ónimniń ózindik quny tómendep, óndiris kólemi ulǵaiady. Sondai-aq, elektrondy kommertsiia salasynda 200 myńǵa jýyq jańa jumys orny ashylady dep otyrmyz. Bizdiń esebimiz boiynsha, tek keden jáne salyq qyzmetterin tsifrlandyrý nátijesinde memleket qazynasyna 100 milliard teńgeden astam qarjy túsedi, – dedi Premer-Ministrdiń orynbasary.
Sońynda Nursultan Nazarbaev «Jahandaný dáýirindegi tsifrlyq kún tártibi» atty halyqaralyq forýmdy ótkizýge daiyndyq jónindegi esepti tyńdap, birqatar naqty tapsyrma berdi.
