Prezident Nursultan Nazarbaev Qazaqstan men Ózbekstan qarym-qatynasy jaqsaryp kele jatqanyn aitty. Jergilikti aqparat quraldarynyń habarlaýynsha, bul týraly Nazarbaev Astana Club jinalysynda málimdegen.
"Ózbekstanda óte jaqsy ózgerister bolyp jatqanyn aita alamyn. Ókinishke orai, osyǵan deiingi jyldary ekonomikadaǵy bailanys bar bolǵany bes paiyzdy qurady. Biz ýaqytty tekke jiberip aldyq. Qazaq astyǵyn Ózbekstan Eýropa arqyly satyp alǵanyn elestetip kórińizshi? Osyndai zaman bolǵan", - dedi prezident.
Biraq sońǵy eki jylda ózara saýda jyl saiyn eki esege ósip otyr. "Shekara ashyq, keden keńistigi ortaq, ekonomikalar qarqyndy bailanysqa tústi. Men Ózbekstan bolashaǵyna zor úmitpen qaraimyn. Qazirgi prezident Shavkat Mirzieev durys joldy tańdady", – dedi Nazarbaev.
Saýda bailanystarynan bólek, Qazaqstan men Ózbekstannyń ortaq máseleleri de bar. "Aral teńizi joǵalar buryn onda bir trillion tonna sý bolǵan, balyqtar kóptep aýlanǵan. Burynǵy Keńes Odaǵynyń ekonomikany qate josparlaýynan tutas teńiz joǵalyp otyr. Endi onyń qaiyrynan milliondaǵan tonna tuz kóterilip keledi. Olar Eýropaǵa, bizdiń asqar taýlarymyzǵa jetip, muzdyqtardy eritedi. Bul - bizdiń ortaq qasiretimiz", – dep málimdedi Qazaqstan prezidenti.
Onyń aitýynsha, memleket basshylary bul máseleni talqylap, álemdik qaýymdastyqtan ekologiialyq apatty boldyrmaý úshin kómek suraǵanyn málimdedi.
