Qazaqstannyń Tuńǵysh Prezidenti Nursultan Nazarbaev otstavkaǵa ketý týraly birneshe jyldan beri oilanyp júrgenin aitty, dep habarlaidy Sputnik Qazaqstan tilshisi.
"Mundai sheshim bir kún nemese bir ai ishinde qabyldana salmaidy. Men buǵan birneshe jyl daiyndaldym. Eger qupiiamdy ashsam, úsh jyldan astam ýaqyt. Ainalama qarap, eldiń ótkeni men bolashaǵy týraly oiladym. Kadrlyq serikterime qarap, osy jyldar boiy olardy tárbieledim. Árbirine úmit arttym. Aqyr sońynda osy durys degen qorytyndyǵa keldim", - dedi Elbasy Nur Otan partiiasynyń kezekten tys sezinde.
Tuńǵysh prezident el basqarýǵa qalai kelgenin de eske aldy. Maýsymda Nazarbaevtyń Qazaqstan kompartiiasy OK-niń birinshi hatshysy qyzmetine kiriskenine 30 jyl tolady. Bul kóshbasshylyq pozitsiia bolatyn.
"Aldymyz bulyńǵyr, qiyn-qystaý kezeń bolatyn, bir jyldan keiin el kúiredi. Quddy tóbe qulaǵandai edi. Jańa osynda otyryp, sol bir jyldar esime tústi. Memlekettiń tizginin osynshama jyl maǵan senip tapsyryp, tózimdilik tanytqandaryńyz úshin alǵys aitamyn. Eger men osy ýaqyt ishinde halyqtyń senimin aqtasam, men baqytty adammyn, baqytty saiasatkermin. Sondyqtan men sanaly sheshim qabyldadym", - dedi Elbasy.
Sóz sońynda Nazarbaev nurotandyqtardy Toqaevty Prezident etip sailaýǵa shaqyrdy.
"Toqaevty prezident etip sailap, oǵan qoldaý kórseteiik", - deidi Tuńǵysh Prezident.
