Memleket basshysynyń tóraǵalyǵymen Qaýipsizdik keńesiniń otyrysy ótti, dep habarlaidy "Ult aqparat" Aqordanyń baspasóz qyzmetine silteme jasap.
Otyrysty ashqan Nursultan Nazarbaev áskeri jattyǵý barysynda qaza tapqan 7 áskeri qyzmetkerdiń týystary men jaqyndaryna barsha Qazaqstan halqynyń jáne jeke óziniń atynan kóńil aitty.
– Jambyl oblysynda qar kóshkini saldarynan bolǵan qaiǵyly oqiǵa týraly habardy zor kúizelispen qabyldadym. Olardyń árqaisysy eliniń naǵyz patrioty bolyp, óz áskeri mindetin sońyna deiin atqardy. Qorǵanys ministrligine qaza tapqan sarbazdardyń otbasylarynyń bárine jan-jaqty kómek pen qoldaý kórsetýdi tapsyramyn. Memlekettik komissiia bolǵan oqiǵanyń sebepterin anyqtaýda. Mundai qaiǵyly jaǵdai bolashaqta qaitalanbaý úshin barlyq qajetti sharalardy qabyldaimyz, – dedi Qazaqstan Prezidenti.
Qaýipsizdik keńesiniń kún tártibine mynadai máseleler shyǵaryldy:
– Qazaqstan Respýblikasy ulttyq qaýipsizdiginiń 2012-2016 jyldarǵa arnalǵan strategiiasynyń iske asyrylý qorytyndylary, Strategiiada belgilengen aldaǵy kezeńge arnalǵan negizgi qadamdardyń tanystyrylymy;
– áskeri-tehnikalyq saiasattyń birqatar aspektisi;
– «EKSPO-2017» halyqaralyq kórmesine daiyndyq jáne ony ótkizý kezinde qoǵamdyq qaýipsizdikti qamtamasyz etý sharalary.
Elbasy quzyretti memlekettik organdardyń kúsh-jigeri arqasynda ótken kezeńde Qazaqstanda syrtqy qaýipsizdik pen ishki saiasi turaqtylyq qamtamasyz etilgenin atap ótti.
– Álemdik ekonomikadaǵy daǵdarys jaǵdaiyna, otandyq ekonomikanyń qiynshylyqtaryna qaramastan makroekonomikalyq kórsetkishterdi tiimdi deńgeide ustap tura aldyq. Ishki, óńirlik jáne jahandyq úderisterge qatysty júrgizilgen taldaý aldaǵy kezeńdegi elimizdiń ulttyq qaýipsizdigine tónýi yqtimal syn-qaterler men qaýipterdi anyqtaýǵa múmkindik berdi. Qazir elimizde Qazaqstan halqyna joldaýda kórsetilgen maqsattar men mindetter, usynylǵan saiasi jáne konstitýtsiialyq reformalar talqylanýda. Jalpy, olardyń deni respýblika turǵyndarynyń qoldaýyna ie bolyp otyr, – dedi Memleket basshysy.
Sondai-aq, Qazaqstan Prezidenti qazirgi kezde qaýiptiligi ózekti bolyp otyrǵan ekstremistik jáne terroristik áreketterge qarsy turý eń áýelgi mindet bolyp tabylatynyn aitty.
– Jańa strategiiada atalǵan qyzmet baǵyttarynyń árqaisysy boiynsha tiisti qurylymdardyń áreket etý sharalary qarastyrylǵan, – dep túiindedi Nursultan Nazarbaev.
Budan bólek, Memleket basshysy memlekettik organdarǵa basqa da salalar men baǵyttarǵa qatysty ulttyq qaýipsizdikti qamtamasyz etý jóninde birqatar mindet qoidy.
