Memleket basshysy, «Nur Otan» partiiasynyń Tóraǵasy Nursultan Nazarbaevtyń sheshimimen Ilia Terenchenko partiia hatshysy qyzmetine taǵaiyndaldy, dep habarlaidy "Ult aqparat" partiianyń baspasóz qyzmetine silteme jasap.
Búgin «Nur Otan» partiiasy Tóraǵasynyń Birinshi orynbasary Máýlen Áshimbaev Ortalyq apparat ujymyna partiianyń jańa hatshysyn tanystyrdy. Máýlen Áshimbaev Ilia Terenchenkonyń jetekshiligimen partiianyń Pavlodar oblystyq filialy nátijeli jumys istegenin erekshe atap ótti. Sondai-aq ol Elbasy Joldaýynda aitylǵan basymdyqtar men partiia qyzmetin jańǵyrtý aiasyndaǵy bastamalardy júzege asyrýǵa jańa hatshynyń úlken úles qosatynyna senim bildirdi.
– Partiiamyzdyń Pavlodar oblystyq filialy sońǵy kezderi barlyq tapsyrmalardy oryndaýda jaqsy qyrynan kórinip keledi. Tipti ony elimiz boiynsha jetekshi filialdardyń biri dep aitýǵa tolyq negiz bar. Bul – árine, Ilia Terenchenkonyń eńbeginiń jemisi. Sondyqtan onyń hatshy bolyp taǵaiyndalýy partiiadaǵy meritokratiia tásiliniń naqty jumys isteitinin kórsetedi. Aldaǵy ýaqytta da osylai ózine júktelgen mindetterdi múltiksiz oryndaǵan mamandarymyzǵa qoldaý kórsetý isi jalǵasatyn bolady. Óitkeni biz óz mamandarymyzdyń qyzmette ósýine múddelimiz. Sol sebepti partiianyń kadrlyq rezervin qalyptastyrý isine de úlken mán berip otyrmyz, – dedi Máýlen Áshimbaev.
Sonymen qatar partiia Tóraǵasynyń Birinshi orynbasary partiianyń aldynda Elbasynyń Joldaýda aiqyndap bergen basymdyqtary men basqa da memlekettik mańyzdy baǵdarlamalardy jáne partiia qyzmetin jańǵyrtý aiasynda qolǵa alynǵan jobalardy júzege asyrý mindetteri turǵanyn aityp, osy iste jańa hatshyǵa úlken jaýapkershilikter júkteletinine nazar aýdardy.
Óz kezeginde, Ilia Terenchenko bul qyzmetti Elbasy men barsha nurotandyqtardyń úlken senimi retinde qabyldaitynyn aitty.
– Alǵash partiia qataryna 2004 jyly kelip, «Jas Otan» Jastar qanatynyń qoǵamdyq jumystaryna turaqty qatysyp júrdim. Odan beri Pavlodar qalalyq máslihatynyń depýtaty, fraktsiia jetekshisi bolyp, keiin partiiamyzdyń oblystyq filialynda eńbek ettim. Osylardy eskere otyryp, jańa qyzmetke taǵaiyndalýymdy, shyn máninde, meritokratiianyń eń jarqyn úlgisi ári mysaly dep qabyldaimyn. Árine, bul – men úshin úlken jaýapkershilik. Sondyqtan Elbasy, partiia Tóraǵasy aldymyzǵa qoiǵan mindetterdiń tabysty oryndalýyna óz úlesimdi qosý úshin bar kúsh-jigerimdi jumsaimyn, – dedi Ilia Terenchenko.
Terenchenko Ilia Sergeevich 1983 jyly 15 qarashada Pavlodar qalasynda týǵan. Zańger, qarjy jáne kredit, sondai-aq, saiasattaný mamandyqtary boiynsha joǵary bilim alǵan. 2006 jyldan beri «Nur Otan» partiiasynyń múshesi.
Birneshe jyl biznes salasynda jumys istegen ol Pavlodar oblysynda kásipkerler palatasynyń aýdandyq filialyn basqarǵan. Sondai-aq «Nur Otan» partiiasy Pavlodar oblystyq filialy tóraǵasynyń orynbasary bolyp qyzmet atqardy. Al 2016 jyldyń sáýir aiynan bastap búginge deiin «Nur Otan» partiiasy Pavlodar oblystyq filialy tóraǵasynyń birinshi orynbasary bolyp jumys istedi.
.jpeg)