Qazaqstannyń Tuńǵysh Prezidenti – Elbasy «Nur Otan» partiiasynyń ortalyq apparatyna baryp, onyń qazirgi jumysymen tanysty jáne qurylymdyq bólimsheler jetekshileriniń qatysýymen keńes ótkizdi, dep habarlaidy "Ult aqparat" Aqordaǵa silteme jasap.
Nursultan Nazarbaev elimizde bolǵan sońǵy saiasi oqiǵalarǵa bailanysty partiianyń aldynda strategiialyq mańyzy bar birqatar mindet turǵanyn aitty.
– Biz jaqynda «Nur Otan» partiiasynyń sezin ótkizip, onyń 20 jyldyq mereitoiyn atap óttik. Partiianyń jańa maqsat-mindetteri aiqyndaldy. Elimizde bolǵan oqiǵalar barsha jurtqa belgili. Men partiianyń, Qaýipsizdik keńesiniń jáne Qazaqstan halqy Assambleiasynyń Tóraǵasy bolyp qala beremin, – dedi Qazaqstannyń Tuńǵysh Prezidenti.
Nursultan Nazarbaev belsendi ári nátijeli jumystyń arqasynda «Nur Otan» partiiasy elimizdiń basty saiasi kúshine ainalǵanyn atap ótti.
– Reformalar, damý, azamattyq qoǵam – partiianyń jumyldyrýshy negizi. Qoǵamnyń turaqtylyǵy, halyqtyń birligi men kelisimi ósip-órkendeýimizdiń basty basymdyqtaryna ainaldy. Azamattarymyzdyń laiyqty ómir súrý deńgeiin qamtamasyz etý jáne Qazaqstandy áleýmettik memleket retinde damytý máselesi basym baǵytymyz bolyp qala beredi, – dedi «Nur Otan» partiiasynyń Tóraǵasy.
Qazaqstannyń Tuńǵysh Prezidenti turǵyndar úshin jańa jumys oryndaryn ashýdyń mańyzdylyǵyn atap ótip, áleýmettik masyldyqqa jol bermeý qajettigine basa mán berdi.
Nursultan Nazarbaev Qazaqstan Respýblikasy Prezidentiniń kezekten tys sailaýynyń ótýine bailanysty «Nur Otan» partiiasy aldaǵy sailaý naýqanyna belsendi qatysýǵa tiis ekenin aitty.
– Keshe Qasym-Jomart Toqaev óziniń zańdy quqyǵyn paidalanyp, Qazaqstan Prezidentiniń kezekten tys sailaýyn ótkizý týraly Jarlyqqa qol qoidy. Bul sailaý biliktiń zańdylyǵyn odan ári nyǵaityp, elimizde turaqtylyqty qamtamasyz etý úshin qajet. Endi bizge partiianyń sezin ótkizip, el prezidenttigine kandidatýra usynýymyz kerek. Partiianyń apparaty sezdi ótkizý úshin qajetti jumystardyń bárin jyldam iske asyrýǵa tiis. Partiiamyzdyń atynan kandidatýra usynǵannan keiin Qoǵamdyq sailaý shtabynyń jumysyn uiymdastyrý qajet. Bul jumyspen meniń birinshi orynbasarym Máýlen Áshimbaev ainalysady, – dedi Qazaqstannyń Tuńǵysh Prezidenti.
Sonymen qatar, Nursultan Nazarbaev sailaýdy tolyǵymen el zańnamasyna sáikes jáne barlyq demokratiialyq normalar men rásimderdi saqtai otyryp ótkizý qajettigine nazar aýdardy.
Keńes barysynda partiia Tóraǵasynyń birinshi orynbasary M.Áshimbaev sailaý shtabyn uiymdastyrý jumystary týraly baiandady.
Nursultan Nazarbaev M.Áshimbaevtyń aqparatyn nazarǵa alyp, partiianyń ortalyq apparaty men filialdary aldaǵy is-sharalardy uiymdastyrý úshin jyldam ári úilesimdi jumys isteýge tiis ekenine toqtaldy.
– Partiiaǵa zor jaýapkershilik júktelip otyr. Bul – tańdap alǵan saiasi baǵdarymyzdyń sabaqtastyǵyn jáne ózim belgilegen barlyq strategiialyq mindetterdi iske asyrýdy qamtamasyz etý. «Nur Otan» Qazaqstandy jańǵyrtatyn basty qozǵaýshy kúshke ainaldy. Sondyqtan, belgilengen mindetterdiń bári tolyǵymen oryndalýǵa tiis, – dedi Nursultan Nazarbaev.
«Nur Otan» partiiasynyń Tóraǵasy «Baqytty otbasy», «Qutty meken», «Aýyl – El besigi» jáne «Halyqqa kómek» jobalaryn tiimdi iske asyrý máseleleri týraly aitty.
Sondai-aq, Elbasy partiianyń 2030 jylǵa deiingi jańa baǵdarlamasyn iske asyrý úshin naqty is-sharalar josparyn bekitýdi tapsyrdy.
Nursultan Nazarbaev partiianyń memlekettik basqarý júiesi úshin kadr daiyndaityn negizgi qurylym bolýǵa tiis ekenin atap ótip, «Nur Otan» partiiasynyń respýblikalyq kadr rezervin jasaqtaýdy tapsyrdy.
Elbasy memlekettik saiasattyń ózekti máseleleri boiynsha partiia músheleri júrgizetin tiimdi aqparattyq-túsindirý jumystarynyń mańyzdylyǵyn atap ótti.
– «Nur Otan» partiiasy meniń saiasatymnyń mánin túsindirý isinde basty institýt bolýǵa tiis. Ýaqyt pen qol jetkizgen jetistikter ustanǵan baǵytymyzdyń durystyǵyn kórsetti. Bul baǵdardy odan ári iske asyrý úshin naqty jumys isteý kerek, – dedi Qazaqstannyń Tuńǵysh Prezidenti.
