Búgin Qazaq ulttyq óner ýniversitetinde «Nevada-Semei» antiiadrolyq qozǵalysynyń 30 jyldyǵyna arnalǵan ǵylymi-praktikalyq konferentsiia ótti, dep habarlaidy "Ult aqparat".
«Konferentsiianyń ashylýynda sóz alǵan Mádeniet jáne sport ministri Aqtoty Raiymqulova jinalǵandarǵa Qazaqstannyń Tuńǵysh Prezidenti – Elbasy Nursultan Nazarbaevtyń quttyqtaý hatyn oqyp berdi. Aqyn, «Nevada-Semei» antiiadrolyq qozǵalysynyń kóshbasshysy Oljas Súleimenov búgingi quttyqtaýy men iadrolyq synaqty toqtatýǵa qosqan eńbegine rizashylyq retinde Elbasy N.Nazarbaevty qozǵalystyń 30 jyldyǵyna arnap shyǵarylǵan mereitoilyq medalimen marapattady. Sondai-aq mereitoilyq medal Mádeniet jáne sport ministrine de tapsyryldy», - delingen QR Mádeniet jáne sport ministrligi taratqan aqparatta.
Jiyn barysynda Aqtoty Raiymqulova búgingi shara – qozǵalystyń saltanatty mereitoiy ǵana emes, qazaqstandyq qoǵam men barsha adamzattyń beibitshilik pen taza ǵalamshar úshin kúresiniń mańyzdy kezeńi ekendigin basa aitqan.
«Nevada-Semei» halyqaralyq antiiadrolyq qozǵalysy belsendileriniń, qoǵamnyń arqasynda 1989 jylǵa josparlanǵan 18 iadrolyq synaqtyń 11-i júzege aspady. Osyndai kúsh-jiger men batyl qadamdaryńyzben sizder ǵalamdyq sanany ózgertýge úles qosyp, beibitsúigishtik ideianyń mańyzdylyǵyn is júzinde dáleldedińizder», - dedi ministr.
Konferentsiia jumysyna Japoniianyń Qazaqstandaǵy elshisi Tatsýhiko Kasai, halyqaralyq qozǵalys músheleri, Nobel syilyǵynyń laýreattary qatysty.
Aita keterligi, Qazaq jerinde 1949 jyldan bastap 40 jylǵa jýyq ýaqyt iadrolyq synaq júrgizildi. 450-dei synaqtyń saldarynan radiatsiialyq sáýleniń kúshti dozasyn alǵan poligon mańyndaǵy aýyl turǵyndary onyń zardabyn áli kúnge tartyp keledi. O.Súleimenov 1989 jyly iadrolyq synaqqa qarsy «Nevada-Semei» qozǵalysyn qurý týraly úndeý tastady. Araǵa 2 jyl salyp, Prezident N. Nazarbaevtyń Jarlyǵymen poligon tolyqtai jabyldy. Keiinnen 29 tamyz – halyqaralyq iadrolyq qarýǵa qarsy kúres kúni bolyp bekitildi.
