Elbasy Astana qalasynyń aktivimen keńes ótkizdi, dep habarlaidy "Ult aqparat" Aqordaǵa silteme jasap.
Kezdesý aldynda qalalyq máslihattyń sessiiasy ótti. Onda depýtattar Astana qalasynyń jańa ákimi Baqyt Turlyhanuly Sultanovtyń kandidatýrasyn biraýyzdan maquldady.
Nursultan Nazarbaev Á.Isekeshevti Prezident Ákimshiliginiń basshysy laýazymyna taǵaiyndalýymen quttyqtap, jańa jaýapty qyzmetine tabys tiledi.
Memleket basshysy Nursultan Nazarbaev Á.Isekeshevtiń kásibi biliktiligi men jeke qasietterin atap ótip, onyń elordany damytý jolynda atqarǵan jumysynyń nátijelerine toqtaldy.
Qazaqstan Prezidenti Astana qalasynyń burynǵy ákimi Á.Isekeshevtiń sińirgen eńbegi jóninde aityp, qalanyń jańa basshylyǵynyń aldynda turǵan mindetterdi atap ótti.
– Men elorda ákimin taǵaiyndaý máselesine zor mán beremin. Qalany damytý isi, sonyń ishinde Astanadaǵy búkil nysandardyń qurylysy únemi meniń jeke baqylaýymda. Bul – men úshin mańyzdy basymdyq. Baqyt Sultanovtyń memlekettik basqarý isindegi tájiribesi mol ári uiymdastyrýshylyq qabileti jetkilikti, – dedi Elbasy.
Jiyn barysynda Qazaqstan Prezidenti Astananyń jańa basshylyǵy aldynda turǵan birqatar basymdyǵy bar mindetterdi atap ótti.
– Damýdyń jańa modelin engizý qajet. Innovatsiiany ilgeriletý jáne kreativti adamdardyń kóbeiýi úshin qolaily orta qalyptastyrǵan jón. Sol úshin qalanyń 2050 jylǵa deiingi uzaq merzimdi damý strategiiasyn ázirleý kerek, – dedi Nursultan Nazarbaev.
Elbasy «Astana» halyqaralyq qarjy ortalyǵynyń múmkindikterin paidalana otyryp, Astanany iskerlik qarjy haby retinde damytýdy jalǵastyrý qajet ekenin aitty.
Memleket basshysy jańa turǵyn úiler salý, turǵyndar úshin qolaily jaǵdai jasaý, áleýmettik nysandar turǵyzý máselelerine erekshe nazar aýdardy.
Sonymen qatar, Qazaqstan Prezidenti qalanyń infraqurylymyn damytý qarqynyn saqtaýdyń jáne shahardy gazben qamtý úshin daiyndyq jumystaryn júrgizýdiń mańyzdylyǵyn aitty.
Nursultan Nazarbaev elordanyń týristik áleýetin damytý isinde álemniń úzdik tájiribelerin qoldanýdy tapsyrdy.
Elbasy qalanyń barlyq memlekettik qurylymdarynyń jumysyn transformatsiialaýdy jalǵastyrý, kórsetiletin memlekettik qyzmet sapasyn arttyrý jáne tsifrlandyrý baǵdarlamasyn iske asyrý máselelerin Astanany odan ári damytýdyń basymdyqtary retinde erekshe atap ótti.
Sońynda Á.Isekeshev pen B.Sultanov senim bildirgeni úshin Nursultan Nazarbaevqa alǵys aityp, bas qalamyz ben búkil elimizdi damytý isine ózderiniń zor úlesterin qosatynyn jetkizdi.
