Memleket basshysy Resei Federatsiiasynyń Prezidenti Vladimir Pýtinmen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
Nursultan Nazarbaev TMD elderi basshylarynyń beiresmi sammitine qatysýǵa shaqyrǵany úshin Vladimir Pýtinge alǵys bildirip, ótken kelissózderdiń tabysty bolǵanyn aitty.
– Elderimiz arasynda sheshimin tappaǵan másele joq. Táýelsizdiktiń 26 jyly ishinde biz bir-birimizge jaqyn bola tústik, sharttyq bazany qalyptastyryp, ózara yntymaqtastyq úshin qolaily jaǵdai jasadyq, – dedi Qazaqstan Prezidenti.
Memleket basshysy Eýraziialyq integratsiia máselelerine erekshe toqtalyp, Qazaqstan men Resei arasyndaǵy yntymaqtastyqtyń tabysty ekenin atap ótti.
– Biz barlyq máseleler boiynsha, sonyń ishinde Kaspii teńizi, «Baiqońyr» ǵarysh ailaǵy jóninde kelissóz júrgizdik. Ǵaryshty igerý salasynda ekologiialyq turǵydan taza janarmaimen jumys isteitin zymyran tasýshylardyń jańa túrin jasaý josparlanyp otyr, – dedi Nursultan Nazarbaev.
Resei Federatsiiasynyń Prezidenti ekijaqty qarym-qatynastar tabysty damyp kele jatqanyna toqtalyp, joǵary sarapshylyq deńgeidegi mamandardyń tsifrlyq tehnologiialardy damytýǵa arnalǵan kezdesýin Qazaqstanda ótkizý jónindegi bastamasy úshin Nursultan Nazarbaevqa alǵys aitty.
– Biylǵy 10 aidyń ishinde elderimiz arasyndaǵy taýar ainalymynyń ósimi 34 paiyzdy qurady. Eń mańyzdysy ári perspektivaǵa baǵyttalǵany – tsifrlyq tehnologiialar salasyndaǵy bizdiń yntymaqtastyǵymyz ben birlesken jumysymyz. Qazaqstan ekonomika, óńirlik jáne halyqaralyq qaýipsizdik, sondai-aq elderimizdiń qorǵanys qabiletin qamtamasyz etý salalarynda bizdiń negizgi seriktesimiz boldy jáne solai bolyp qala bermek, – dedi Resei Prezidenti.
Sondai-aq, kezdesý barysynda memleketter basshylary energetika, ǵaryshty igerý jáne tsifrlyq ekonomika salasyndaǵy yntymaqtastyq máselelerin talqylady.
