«Nur Otan» partiiasynyń Tóraǵasy Nursultan Nazarbaev partiianyń Saiasi keńesi Biýrosynyń múshesi, Premer-Ministr Asqar Mamindi qabyldady. Bul týraly "Ult aqparat" elbasy saityna silteme jasap habarlaidy.
Kezdesýde Elbasyǵa 2020 jyly áleýmettik-ekonomikalyq jáne sanitarlyq-epidemiologiialyq ahýaldy turaqtandyrý boiynsha qabyldanǵan sharalardyń nátijesi týraly baiandaldy.
Qazaqstannyń Tuńǵysh Prezidenti 2020 jyly koronavirýs pandemiiasyna bailanysty Úkimet jumysy kúrdeli jaǵdaida ótkenin aitty.
Elbasy ulttyq ekonomikanyń turaqtylyǵyn saqtaý jáne strategiialyq damý baǵdarlamalaryn iske asyrý jónindegi Úkimettiń der kezinde qabyldaǵan sharalaryna toqtalyp, negizgi makroekonomikalyq kórsetkishterdiń óskenin atap ótti.
Premer-Ministrdiń málimetine sáikes, negizgi kapitalǵa salynǵan investitsiialar 17 protsentke ulǵaiyp, jumyssyzdyq 5 protsentti qurady. Jeńil ónerkásipte 16 protsent, farmatsevtikada 40 protsent, mashina jasaýda 16 protsent, qurylysta 12 protsent jáne basqa salalarda da ósim bar.
Sondai-aq Qazaqstannyń Tuńǵysh Prezidentine elimiz boiynsha 19 myńǵa jýyq jumys ornyn qurýǵa múmkindik bergen Indýstriialandyrý kartasy aiasynda júzege asyrylyp jatqan jobalar týraly aqparat berildi.
A.Mamin óz sózinde memlekettik organdardyń, qoǵamdyq institýttardyń birlesken is-qimyly jáne «Nur Otan» partiiasynyń belsendi jumysynyń arqasynda Qazaqstanda pandemiianyń jappai órshýine jol berilmegenin atap ótti.
