Latyn álipbiine kóshýdi 2025 jylǵa deiin soza berýdiń qajeti joq. Bul týraly búgin elordadaǵy Táýelsizdik saraiynda ótip jatqan Dúniejúzi qazaqtarynyń V quryltaiynda Qazaqstan Prezidenti Nursultan Nazarbaev aitty, dep habarlaidy QazAqparat.
"Qazaq tilin latyn árpine kóshirý - bul ana tilimizdiń jahandyq ǵylym men bilimge kirigýin, rýhani tutastyǵyn qamtamasyz etetin biregei qadam. Burynǵy KSRO aýqymynda, TMD dep atalatyn biz - kirillitsa, qytaidaǵy qandastarymyz - tóte jazý, batys elderindegi baýyrlarymyz latyn árpin qoldanady. Sonda, sóileskende tilimiz bir bolǵanymen, oqyǵanda tilimiz úsh túrli. Bir-birimizdi túsine almaimyz. Jazýyn uqpaimyz. Bul bir jaǵynan, jer júzine tarydai shashylǵan qazaqtyń keiingi urpaǵyn bir-birinen alystady. Ekinshi jaǵynan, ǵylym men tehnikaǵa, internetke úirenetin jaǵdaiymyz bar. Olardyń latyn árpimen júretinin bilesizder", - dedi Nursultan Nazarbaev.
Memleket basshysy kóp uzamai bul olqylyqtar joiylatyndyǵyn, qazaq tiliniń latyn álipbiine kóshýi birligimizdi nyǵaityp, rýhani jaqyndastyra túsetindigin basa aitty.
"Men ózimniń Joldaýymda bul máselede «2025 jylǵa deiin» dep meje qoiǵan bolatynmyn. Biraq ta ony soza berýdiń qajeti joq dep oilaimyn. Bizdiń ǵalymdarymyz tiisti áriptiń bizge kerek úlgilerin túrik jáne basqa latyn árpine kóshken Ázerbaijan, Ózbekstan úlgilerine qarap otyryp, kemshilikterin eskere otyryp, bizge kerekti álippeni tańdap alýy kerek. Menińshe, qiyndyǵy joq. Sebebi, 1 synyptan bastap barlyq balalarymyz aǵylshyn tilinde oqidy. Barlyq mektepterde aǵylshyn tili oqytylady. Olarda latyn árpi qoldanylady. Ósip kele jatqan urpaqqa onyń eshqandai qiyndyǵy joq. Bizge de onsha qiynshylyǵy joq dep oilaimyn. Keibir aǵaiyndardyń bizdiń shyǵarmalarymyz ne bolady dep qynjylatyny bar. Qazirgi internet zamanynda eshqandai problema joq", - dedi Qazaqstan Prezidenti.
