Nursultan Nazarbaev QHR Tóraǵasy Si Tszinpindi Qazaqstanǵa resmi saparmen kelýge shaqyrdy. Bul týraly Memleket basshysy Qytaiǵa memlekettik sapary aiasynda ótken Qytai basshysymen keńeitilgen quramdaǵy kelissózder barysynda aitty, dep habarlaidy QazAqparat tilshisi.
«Bizdiń ekijaqty qarym-qatynasymyz barlyǵyn da yntymaqtastyqqa shabyttandyrady. 2012 jyldan bastap sizben 18-ret kezdesip otyr ekenmin. Bul joǵary deńgeidegi kezdesýlerdiń oń dinamikasyn kórsetip, basqa da yntymaqtastyqqa serpin beredi. Osy jyldardyń ishinde jalpy somasy 67 mlrd dollarǵa ekijaqty kommertsiialyq 127 qujatqa qol qoiyldy. Qazaqstan halqynyń 18 million adam ekendigin eskersek, bul onyń ekonomikasyna óte úlken qoldaý boldy. Táýelsizdik jyldary ishinde mundai kómekti basqa elderden alyp kórgenimiz joq», - dedi Elbasy.
Memleket basshysy Si Tszinpinniń eki eldiń arasyndaǵy qarym-qatynastyń dostyq, teń quqylyq, egemendik pen aimaqtyq tutastyqqa ózara qurmet rýhynda órbýine úlken úles qosyp kele jatqanyn atap ótti.
«Bizge bul suhbatty belsendi túrde jalǵastyrý qajet dep oilaimyn. Osyǵan bailanysty sizdi Qazaqstanǵa ózińizge yńǵaily kez kelgen ýaqytta resmi saparmen kelýge shaqyramyn»,- dedi Nursultan Nazarbaev.
Aita keteiik, Elbasy Nursultan Nazarbaev Qytaiǵa memlekettik sapary aiasynda 10 maýsym kúni Tsindao qalasynda ótetin Shanhai yntymaqtastyq uiymyna múshe memleketter basshylarynyń keńesine qatysady dep kútilýde.
