نۇرسۇلتان نازارباەۆ قحر تٶراعاسى سي تسزينپيندٸ قازاقستانعا رەسمي ساپارمەن كەلۋگە شاقىردى. بۇل تۋرالى مەملەكەت باسشىسى قىتايعا مەملەكەتتٸك ساپارى اياسىندا ٶتكەن قىتاي باسشىسىمەن كەڭەيتٸلگەن قۇرامداعى كەلٸسسٶزدەر بارىسىندا ايتتى, دەپ حابارلايدى قازاقپارات تٸلشٸسٸ.
«بٸزدٸڭ ەكٸجاقتى قارىم-قاتىناسىمىز بارلىعىن دا ىنتىماقتاستىققا شابىتتاندىرادى. 2012 جىلدان باستاپ سٸزبەن 18-رەت كەزدەسٸپ وتىر ەكەنمٸن. بۇل جوعارى دەڭگەيدەگٸ كەزدەسۋلەردٸڭ وڭ ديناميكاسىن كٶرسەتٸپ, باسقا دا ىنتىماقتاستىققا سەرپٸن بەرەدٸ. وسى جىلداردىڭ ٸشٸندە جالپى سوماسى 67 ملرد دوللارعا ەكٸجاقتى كوممەرتسييالىق 127 قۇجاتقا قول قويىلدى. قازاقستان حالقىنىڭ 18 ميلليون ادام ەكەندٸگٸن ەسكەرسەك, بۇل ونىڭ ەكونوميكاسىنا ٶتە ٷلكەن قولداۋ بولدى. تەۋەلسٸزدٸك جىلدارى ٸشٸندە مۇنداي كٶمەكتٸ باسقا ەلدەردەن الىپ كٶرگەنٸمٸز جوق», - دەدٸ ەلباسى.
مەملەكەت باسشىسى سي تسزينپيننٸڭ ەكٸ ەلدٸڭ اراسىنداعى قارىم-قاتىناستىڭ دوستىق, تەڭ قۇقىلىق, ەگەمەندٸك پەن ايماقتىق تۇتاستىققا ٶزارا قۇرمەت رۋحىندا ٶربۋٸنە ٷلكەن ٷلەس قوسىپ كەلە جاتقانىن اتاپ ٶتتٸ.
«بٸزگە بۇل سۇحباتتى بەلسەندٸ تٷردە جالعاستىرۋ قاجەت دەپ ويلايمىن. وسىعان بايلانىستى سٸزدٸ قازاقستانعا ٶزٸڭٸزگە ىڭعايلى كەز كەلگەن ۋاقىتتا رەسمي ساپارمەن كەلۋگە شاقىرامىن»,- دەدٸ نۇرسۇلتان نازارباەۆ.
ايتا كەتەيٸك, ەلباسى نۇرسۇلتان نازارباەۆ قىتايعا مەملەكەتتٸك ساپارى اياسىندا 10 ماۋسىم كٷنٸ تسينداو قالاسىندا ٶتەتٸن شانحاي ىنتىماقتاستىق ۇيىمىنا مٷشە مەملەكەتتەر باسشىلارىنىڭ كەڭەسٸنە قاتىسادى دەپ كٷتٸلۋدە.
