Qytai «Bir beldeý, bir jol» bastamasyn kóterip, halyqaralyq kooperatsiiany yntalandyrý jónindegi mindetti moinyna aldy. Bul týraly búgin «Bir beldeý, bir jol» atty joǵary deńgeidegi forým kóshbasshylarynyń dóńgelek ústelinde Qazaqstan Prezidenti Nursultan Nazarbaev habarlady, dedi Qytaidaǵy "QazAqparat" tilshisi.
«Biz qazir bul aǵymdaǵy júzjyldyqtan bastap kúsheiip kele jatqan álemdegi saiasi ekonomikalyq jáne gýmanitarlyq daǵdarysqa der kezinde berilgen jaýap ekenin kórip otyrmyz. Paternalizm, saiasi dáleldi sanktsiialar qoldaný milliondaǵan halyqtyń ómiriniń ekonomikalyq belsendiligin álsiretip jiberdi. Nátijesin sońǵy jyldardaǵy álemdik ekonomika men saýda-sattyqtyń tómendep, baiaýlaýynan baiqaýǵa bolady. Osy jaǵdaida álem halyqaralyq kooperatsiiany yntalandyrýdyń jańa draiverine óte muqtaj boldy, bul róldi ózine naryqtardy damytýdyń jańa biriktirilgen bastamasymen Qytai aldy», - dedi Memleket basshysy.
Onyń aitýynsha, «Bir beldeý, bir jol» bastamasy jańa geoekonomikalyq paradigmany qalyptastyrady. Ony sátti iske asyrý 4,5 mlrd jiyntyq halyqpen osy joldaǵy elderge paida ákeledi, Qytai Halyq Respýblikasy úshin naryq ashady.
«Birinshiden, «Bir beldeý, bir jol» bastamasymen Qytai álemge óńirlik kooperatsiianyń jańa úlgisin kórsetti.
«Birlesip damý arqyly turaqtylyqqa» degen ustanymdy kózdeitin bul jariialanǵan tásil ondaǵan memleketterdiń ekonomikalyq múddelerimen úndesetin halyqaralyq yntymaqtastyqtyń tartymdy úlgisi. Osyǵan bailanysty qazir Jibek jolynyń belgili bir jiegi kóringende, bul makroóńirlik kooperatsiiany birlesip strategiialyq turǵydan úilestirý qajet, forýmnyń róli de osyny qamtidy», - dep atap ótti N. Nazarbaev.
Ekinshiden, - dep sózin jalǵastyrdy Elbasy. Jibek jolynyń bastamalaryn iske asyrý tutas óńirlerdi, onyń ishinde jahandyq kontekste Qazaqstan da kiretin Ortalyq Aziiany jańadan jaiǵastyrýǵa yqpal etedi. «Bizdiń geografiia bizge ortaq paida ákeledi. Ortalyq Aziia, júz jyl burynǵy óziniń altyn kezeńi siiaqty qazir de iri naryqtar arasynda basty kópirge ainalyp, qaitadan strategiialyq mánge ie boldy. Ár jyl saiyn Tynyq muhitynan Atlantikaǵa deiin barlyq jańa jáne jyldam marshrýttar igerilýde, sonyń arqasynda Eýraziianyń ózinde ǵana saýda kólemi 2020 jyly 1,2 trillionǵa artpaq. Iran, Aýǵanstan jáne odan ári Taiaý shyǵys pen Ońtústik Aziia naryqtaryna shyǵý múmkindikteri júzege asyrylýda», - dedi Prezident.
Eske salsaq, N. Nazarbaev «Bir beldeý, bir jol» forýmyna qatysýmen, QHR-da ekikúndik resmi issaparda júr.
