Qazaqstan prezidenti Nursultan Nazarbaev Helsinki qorytyndy aktisiniń 45 jyldyǵyna orai 2020 jyly qaýipsizdik pen yntymaqtastyq boiynsha konferentsiia ótkizýdi usyndy, dep habarlaidy Sputnik.
"Jaqynda Parijde Birinshi jáne Ekinshi dúniejúzilik soǵystar kelissózder men dialogtardyń joqtyǵynan bastalǵany týraly aityldy. Meniń usynysymnyń máni – álemdik derjavalar árqashan adamzattyń bolashaǵyn oilap álemdik isterge asa joǵary jaýapkershilikpen qaraýy tiis. Ásirese, Resei, Qytai, AQSh, Eýropalyq odaq. Osy tórt tarap qazirgi zamanda dialogtyń jańa formatyn tabýy tiis", — dedi memleket basshysy "Astana Klýb" plenarlyq otyrysynyń ashylýynda.
Elbasy eske sala ótkendei, AQSh Birinshi dúniejúzilik soǵystan keiin Ulttar Ligasyn, Ekinshi dúniejúzilik soǵystan keiin BUU-n qurýǵa bastamashy boldy.
"Munyń ońai emes ekenin túsinemin, biraq osy tórt tarap bas qosyp, ekonomikalyq, saiasi, áskeri jáne basqa da máselelerdi talqylaýy úshin Astana alańqaiyn usyndym. Osy turǵyda Qyrǵi-qabaq soǵysy kezinde qabyldanǵan 1975 jylǵy Helsinki qorytyndy aktisin jańartqan jón dep sanaimyn. Osy strategiialyq qujattyń qabyldanǵanyna 45 jyl tolǵanda – 2020 jyly qaýipsizdik pen yntymaqtastyq boiynsha konferentsiia ótkizýdi usynamyn", — dedi Qazaqstan prezidenti.
Nazarbaev jańa kelisimdi qabyldaý protsesi ońai bolmaitynyn moiyndap, "keibir iri derjavalar kópjaqty formatta emes, eki jaqty tártippen jumys istegendi jón sanaitynyn" atap ótti.
Sol sebepti memleket basshysy 2019 jyldan bastap qorytyndy kelissózderge daiyndyqty bastaǵan jón dep sanaidy.
"Qazaqstan bolashaqta mundai sharany ótkizýge daiyn, óitkeni biz osy júz jyldyqta bir-aq ret bolǵan EQYU sammitin ótkizdik. Álbette, bul jaǵdaida kóp nárse álemdik derjavalardyń ustanymyna bailanysty bolady. Sol sebepti álemdik derjavalardy jańa kelisimge kelý úshin birigip jumys isteýge shaqyrǵymyz keledi", — dep túsindirdi ol.
Atap ótsek, EQYU múshe elderiniń memleket basshylary men úkimetteriniń birinshi sammitiniń qorytyndy aktisi 1975 jyly 1 tamyzda Helsinki qalasynda qabyldanǵan bolatyn. Qujatqa 35 memleket qol qoidy, oǵan halyqaralyq-quqyqtyq, áskeri-saiasi, ekonomikalyq jáne gýmanitarlyq salalardaǵy memleketaralyq kelisimder kiredi.
