Damyǵan elderdiń ózderinde qoǵam men elitanyń bólinýi baiqalady. Bul týraly Qaýipsizdik Keńesiniń otyrysynda Elbasy Nursultan Nazarbaev aitty, dep habarlaidy "Ult aqparat".
«Qaýipsizdik keńesiniń otyrysynda 2 mańyzdy máseleni qaraiyq dep otyrmyz. Birinshisi - 2021-2025 jyldarǵa arnalǵan Ulttyq qaýipsizdik strategiiasynyń jobasy. Biz bir memleket, birtutas ult retinde betburys kezeńine kelip jettik. Bul ózgerister koronavirýs pandemiiasynan týyndady. Dúniejúzilik ekonomikalyq forýmnyń boljamynsha, onyń áseri aldaǵy onjyldyqqa sozylýy múmkin. Pandemiia saldarynan álem jańa dáýirge aiaq basqanyn kórip otyrmyz. Sondyqtan elimizdiń aldynda múldem basqa synaqtar tur», - dedi otyrysta ashqan Elbasy.
Qazaqstannyń Tuńǵysh Prezidenti tipti damyǵan elderdiń ózinde qoǵam men elita bólinýi baiqalyp otyrǵandyǵyna basa nazar aýdartty.
«Álemde jáne tóńiregimizde ne bolyp jatqanyn qarańyzdar. Osy jyldyń ózinde postkeńestik keńistikte jappai saiasi tolqýlardy, memleketter arasyndaǵy, Ortalyq Aziiadaǵy, barlyq úlken óńirlerdegi soǵysty kórdik. Tóńirektegi ahýal da turaqsyz. Tipti, damyǵan elderdiń ózderinde qoǵam men elitanyń bólinýin baiqap otyrmyz. Sarapshylardyń baǵalaýynda, álem jańa bipoliarlyqqa bara jatyr. Bul jai ǵana jekelegen salalarda, básekelestik pen damý modelinde qatań kúresti bildiredi. Shyndap kelgende, biz qyrǵi-qabaq qaqtyǵystyń ekinshi nusqasy – ideologiia soǵysyna qaita oralyp kelemiz. Biz mundai jaǵdaida osy jyldardyń ishinde negizin qalaǵan basymdyqtarymyzdy, syrtqy saiasi teńgerimimizdi qalai saqtap qalý kerektigin naqty túsinýimiz kerek», - dedi Nursultan Nazarbaev.
