Elbasy Qazaqstan Respýblikasy Memlekettik kúzet qyzmetiniń basshylyq quramymen kezdesti, dep habarlaidy "Ult aqparat" Aqordaǵa silteme jasap.
Kezdesýde Nursultan Nazarbaev Memlekettik kúzet qyzmetiniń basshylyq quramyna osy mekemeniń jańa bastyǵy Ardaq Áshimbekulyn tanystyrdy.
A.Áshimbekuly zańnamaǵa sáikes ant berdi.
Qazaqstan Prezidenti Nursultan Nazarbaev A.Áshimbekulynyń tájiribesi mol ekenin atap ótip, onyń kásibi biliktiligine toqtaldy.
Sondai-aq, Elbasy Memlekettik kúzet qyzmetiniń qoǵamdaǵy qaýipsizdik pen turaqtylyqty qamtamasyz etý isinde mańyzdy ról atqaratynyna nazar aýdardy.
– El qaýipsizdigi júiesinde Memlekettik kúzet qyzmetiniń róli airyqsha. Bul aldaryńyzǵa qoiylǵan mindetterdiń ereksheligine bailanysty, – dedi Nursultan Nazarbaev.
Memleket basshysy Kúzet qyzmetiniń tiimdi jumys isteýi úshin búginde barlyq quqyqtyq jáne materialdyq-tehnikalyq jaǵdai jasalǵanyn atap ótti.
– Qaýip-qaterdi toitarýǵa árdaiym daiyn bolý, jańa syn-qaterlerge beiimdelý, qaterlerdiń aldyn alýǵa jáne aýyzdyqtaýǵa baǵyttalǵan shuǵyl jáne kúzet sharalarynyń keshenin jetildirý – sizderdiń mindetterińiz. Sondyqtan, Memlekettik kúzet qyzmetiniń áleýetin arttyrý jáne ony jan-jaqty jańǵyrtý jónindegi jumystardy júrgizý qajet, – dedi Qazaqstan Prezidenti.
Jiyn sońynda Elbasy Memlekettik kúzet qyzmetiniń jedel is-qimyl shtabynyń jáne osy mekemeniń basqa da jumystarymen tanysty.
