Qostanai oblysyna jumys saparymen barǵan Memleket basshysy Nursultan Nazarbaev sheteldik investorlarmen kezdesý ótkizdi, dep habarlaidy "Ult aqparat" QazAqparat agenttigine silteme jasap.
«Qostanai oblysy - elimizdiń eń iri agrarlyq óńirleriniń biri. Azyq-túlik ónimderin óndirý boiynsha eń úlken aimaq. Biyl qiyn jyl bolǵannyń ózinde de munda 5 million tonnadan astam ónim jinaldy. Biz bul óńirdi agrarly-ónerkásiptik aimaqqa ainaldyrýdy jalǵastyra beretin bolamyz. Sondyqtan aimaqtyń ónerkásibin kóterý baǵytynda jumys atqaramyz», - dedi Memleket basshysy.
Elbasy osyǵan bailanysty Qostanai oblysynda avtokólik óndirisin damytý jumysy qarqyndy túrde júrgizilip jatqanyn aitty.
«Bul eki zaýyt (Qostanai jáne Óskemendegi eki avtokólik zaýyty - avt.) óte tiimdi jumystar jasaýda. Biz investorlardy tartamyz. Qytai korporatsiiasynyń osynda jumysqa kiriskeni (CNC kompaniiasynyń «Alliýr» aktsiialaryn satyp alýy) - Qytai basshysy Si Tszinpinmen jasalǵan kelisimderimizdiń júzege asyrylýy bolyp tabylady », - dep atap ótti Prezident.
Osylaisha, «Bir beldeý - bir jol» jobasy negizindegi kelisim aiasynda Qazaqstanda quny 27 mlrd AQSh dollarlyq 52 kásiporyn salynatyn bolady.
«Biz óz tarapymyzdan osy baǵdarlamaǵa tolyǵymen qosyldyq. Qazaqstan-Qytai shekarasynan Kaspii teńizine deiingi 1200 shaqyrymdyq tikelei temirjoldy 18 aidy salyp bitirdik. Túrkimenstan arqyly jol saldyq. Jaqynda ǵana Qazaqstan - Ázerbaijan - Grýziia jáne Eýropa baǵytyndaǵy temirjoldyń qurylysy aiaqtaldy», - dedi Memleket basshysy.
Aita ketý kerek, Qostanai oblysynyń ákimi Arhimed Muhambetov Memleket basshysymen kezdesý barysynda aimaqtaǵy investitsiialyq jobalardyń júzege asyrylýy týraly aityp berdi. Avtokólik ónerkásibindegi qytai jáne ózbek seriktesterimen birlesken jumys barysy týrasynda Nursultan Nazarbaevqa «Global Gas Group» JShS direktory Oleg Goncharov habardar etti.
.jpeg)