Elbasy Qytai Halyq Respýblikasynyń Qazaqstandaǵy Tótenshe jáne Ókiletti Elshisi Chjan Siaony qabyldady, dep habarlaidy elbasy.kz saity.
Nursultan Nazarbaev Qytai Halyq Respýblikasynyń Elshisin Qytai Kommýnistik partiiasynyń qurylǵanyna 100 jyl tolýymen quttyqtap, Qytai Kommýnistik partiiasy Ortalyq komiteti bas hatshysy Si Tszinpinge jyly lebizin joldady.
– Búgin Qytai Kommýnistik partiiasynyń 100 jyldyǵy atalyp ótilýde. Tóraǵa Si Tszinpindi jáne barsha qytai halqyn osy aitýly kúnmen quttyqtaimyn. Osy jyldar ishinde Qytai Halyq Respýblikasy alǵa qarai úlken qadam jasady. Kommýnistik partiianyń jospary Qytaidyń áli de nyǵaiyp, dami beretinin kórsetip otyr, – dedi Qazaqstannyń Tuńǵysh Prezidenti.
Elbasy Qazaqstan men Qytai arasyndaǵy máńgilik jan-jaqty strategiialyq seriktestiktiń damýynyń oń qarqynyn atap ótti.
– Qytai Halyq Respýblikasy álemdik aýqymdaǵy qýatty memleketke ainaldy. Ekonomikasy dúnie júzi boiynsha ekinshi orynda jáne tehnologiialyq damý deńgeii joǵary. Kedeilikpen kúres máselesinde de Qytai úlken qadam jasady. Men árdaiym bizdiń qarym-qatynasymyzdy qoldap kelemin. Máńgilik jan-jaqty strategiialyq seriktestik eki halyqtyń igiligi úshin jumys istei beredi. Qazaqstannyń Qytai Halyq Respýblikasymen yntymaqtastyǵy – memleketaralyq qatynastyń jarqyn úlgisi, – dedi N.Nazarbaev.
Óz kezeginde Qytai Halyq Respýblikasynyń Elshisi Chjan Siao Elbasyǵa quttyqtaýy úshin alǵysyn bildirip, 1 shilde – Qytai Kommýnistik partiiasynyń músheleri úshin eń erekshe ári umytylmas kúnderdiń biri ekenin aitty.
– Sizge baiyrǵy ári jaqyn dosyńyz Tóraǵa Si Tszinpinniń eń izgi tilegi men ystyq sálemin jetkizgim keledi. Sizdiń 6 shildede ótetin Álemdik saiasi partiialar kóshbasshylarynyń sammitine qatysý týraly sheshimińizdi joǵary baǵalaimyz. Bul óte mańyzdy oqiǵa. Oǵan Sizdiń qatysýyńyz Qazaqstan-Qytai qarym-qatynasyn damytýǵa jáne Qytai Kommýnistik partiiasy men Nur Otan arasyndaǵy partiiaaralyq bailanysty arttyrýǵa serpin bereri sózsiz, – dedi Qytai Halyq Respýblikasynyń Tótenshe jáne Ókiletti Elshisi.
