Búgingi kúni halyqtyń basym bóligi Qazaqstanda buryn-sońdy bolmaǵan deńgeide turyp jatyr. Bul týraly "Bes áleýmettik bastama – qoǵamnyń áleýmettik birliginiń tuǵyry" degen kún tártibimen ótip jatqan Qazaqstan halqy Assambleiasynyń XXVI sessiiasynda memleket basshysy Nursultan Nazarbaev aitty, habarlaidy Sputnik Qazaqstan tilshisi.
"Qańtarda búkilálemdik ekonomikalyq forýmda memleketterdiń ekonomikasyn baǵalaýdyń jańa júiesi engizildi. Ol ekskliýzivtik damýdyń indeksi dep atalady. Bul júie ishki jalpy ónim ósimi men basqa 11 parametrdi negizge alady, onyń ishinde densaýlyq saqtaý, bilim, el azamattarynyń kóńil-kúii bar. Osy reitingte damýshy 74 memlekettiń ishinde Qazaqstan 15-shi oryndy ielendi", — dedi Nursultan Nazarbaev.
Memleket basshysy bul bizdiń orasan jumysymyzdyń laiyqty nátijesi ekenin atap ótti. Nazarbaev qazaqstandyqtar elimizdiń tabystary men óziniń ál-aýqaty arasyndaǵy tikelei bailanysty aiqyn kórip otyr degen senimin bildirdi.
"Jiyrma birinshi ǵasyrdyń basynda biz qandai edik? Búgingi kúnmen salystyrǵanda aiyrmashylyq úlken. Meniń oiymsha, bul árqaisymyzdyń ómirimizden seziledi. Qazir árbir otbasynda derlik kólik bar, keibireýinde birneshe kólikten. Terezeden qarap otyryp, árbir qazaqstandyqtyń ómirinen ózgeris kóresiń. Árine, biz áli kómek kórsetýimiz qajet adamdar bar. Biraq, halyqtyń basym bóligi qazir Qazaqstanda buryn-sońdy ómir súrmegen deńgeide turyp jatyr", — dedi sessiiada prezident.
Aita keteiik, Assambleianyń XXVI sessiiasyna 1 500-den astam delegat jinaldy.
