Búgin Memleket basshysy Qazaqstan Respýblikasynyń Parlamenti palatalarynyń birlesken otyrysyna qatysty, dep habarlaidy "Ult aqparat" Aqordanyń baspasóz qyzmetine silteme jasap.
Parlament depýtattary aldynda sóilegen sózinde Elbasy Qazaqstan Konstitýtsiiasyna ózgerister engizý arqyly júzege asyrylatyn saiasi reformalardyń basty faktorlary men aspektilerin atap ótti.
Nursultan Nazarbaev elimizdiń negizgi zańyna engizý usynylǵan ózgerister jobasyn ázirleý úderisine arnaiy toqtalyp, ony talqylaý barysynda jariialylyq qamtamasyz etilgenin aitty.
– Meniń Jarlyǵymmen ázirlengen konstitýtsiialyq reformalar jobasy bir ai boiy ótken búkilhalyqtyq qyzý talqylaýǵa salyndy. Ár turǵyn usynys berý quqyǵyna ie boldy. Bárimiz zań jobasyn jappai talqylap qana qoimai, onyń sapaly bolǵanyn kórip otyrdyq, – dedi Qazaqstan Prezidenti.
Sondai-aq, Memleket basshysy Jumys toby atqarǵan jumys qorytyndysyna toqtalyp, Konstitýtsiianyń 26-babyna qatysty ózgeristerdi halyqtyń jekelegen bóliniń árqily túsingenin aitty.
– Jumys tobyna Konstitýtsiia baptarynyń úshten ekisin jáne onyń barlyq bólimin qamtityn 6 myń usynys kelip tústi. Búkil Konstitýtsiialyq reforma qoǵamymyzdy biriktirýge baǵyttalady. Sondyqtan men 26-bapty burynǵy redaktsiiada qaldyrýdy usynamyn. Jalpyulttyq talqylaýdy eskerip, zań jobasyn Qazaqstan halqynyń ortaq ustanymy dep baiyptaýǵa bolady. Jurt óz sózin aityp, sol arqyly memlekettik biliktiń jańǵyrýyn qoldady, – dedi Nursultan Nazarbaev.
Elbasy qazirgi reformalardyń ereksheligin atap ótip, eldi saiasi jańǵyrtýdyń jekelegen kezeńderine nazar aýdardy.
– Birinshiden, jańa zań Parlamenttiń memlekettik isterdegi, sonyń ishinde Úkimetti jasaqtaýdaǵy rólin aitarlyqtai kúsheitedi. Ekinshiden, ekonomikany tikelei basqarý jónindegi ókilettikter beriletin Úkimettiń derbestigi artady. Úshinshiden, quqyq qorǵaý jáne sot júiesiniń konstitýtsiialyq negizi jańǵyrtylady. Zańdardyń saqtalýyn joǵary deńgeide baqylaýdy, sotta memleket múddesin qorǵaý jaiyn qarastyratyn prokýratýra qyzmetiniń bazalyq negizderi qalanady. Tórtinshiden, konstitýtsiialyq baqylaý júiesi nyǵaia túsetin bolady. Besinshiden, Táýelsizdigimizdiń, birtutastyǵymyzdyń, aýmaqtyq tutastyq pen basqarý nysanynyń ózgermeitinine konstitýtsiialyq deńgeide kepildik beriledi, – dedi Elbasy.
Memleket basshysy biliktiń barlyq tarmaǵynyń joǵary kásibiligin, olardyń ózine jaýapkershilik alyp, sheshim qabyldai alatyn qabiletin atap ótti.
Budan bólek, Qazaqstan Prezidenti prezidenttik basqarý nysanynyń, memleket pen qoǵamdy odan ári jańǵyrtý úshin saiasi jaǵdailar jasaý maqsatymen júrgizilip jatqan reformalar baǵytynyń saqtalatynyn málimdedi.
– Joldaýda aitylǵan jańa mindetter zań shyǵarýshy jáne atqarýshy organdarǵa airyqsha jaýapkershilik júkteidi. Parlament pen Úkimettiń ókilettikterin keńeitý el ekonomikasynyń úshinshi jańǵyrýynyń maqsattaryna tiimdirek qol jetkizýge septigin tigizetin bolady, – dedi Nursultan Nazarbaev.
Sońynda Elbasy Parlament depýtattary aldynda zań jobasyn belgilengen barlyq úderisterdi saqtai otyryp qarastyrý jóninde usynys bildirdi.
Memleket basshysynan keiin sóz alǵan Prezident Ákimshiliginiń basshysy – Memlekettik bilik tarmaqtary arasynda ókilettikterdi qaita bólý máseleleri jónindegi jumys tobynyń jetekshisi Á.Jaqsybekov usynylatyn ózgeristerdiń naqty jobasyn Parlament depýtattaryna tanystyrdy.
