QR Prezidenti Nursultan Nazarbaev Dúniejúzi qazaqtarynyń quryltaiynda syrt elde júrgen qandas baýyrlarǵa alǵys aitty, dep habarlaidy QazAqparat.
«Ardaqty aǵaiyn, qurmetti baýyrlar! Dúniejúzi qazaqtarynyń besinshi quryltaiyna kelgen barshańyzǵa qazaqtyń qasterli atajurty - Qazaq Eline, onyń bas ordasy - Astanamyzǵa qosh keldińizder deimin! Jańa aityp ketkendei, alqaly jiynǵa alty qurlyqqa jaiylyp ketken 350-den astam qandas delegattarymyz kelip otyr. Qaida júrse de, qazaqtyń tarihi Otany bireý ǵana, ol - Qazaqstan! Atamekenimiz jalǵyz! Ol - bir ýys topyraǵyna deiin qasietti bizdiń Uly dala Qazaq Elimiz!», - dedi Elbasy Quryltaidyń ashylý saltanatynda.
«Búgingi basqosýǵa meniń qolymda bar málimet boiynsha, jas býyn ókilderi qatysyp otyr. Sebebi jas urpaq túbi, tarihy, negizi - qazaq elinde ekenin eshqashan umytpaidy. Olardyń ata-analaryna óte úlken rahmetimizdi aitýymyz kerek. Olar tamyryn tarihi Otanynda jaiýdy oilaidy. Týǵan elmen bailanysyn nyǵaityp, ata saltyn saqtap, ana tilin umytpaýǵa tyrysady», - dedi Prezident.
Aita keteiik, Astana qalasynda Dúniejúzi qazaqtarynyń V Quryltaiy óz jumysyn bastaǵan bolatyn. Quryltai jumysyna barlyǵy 800 delegat pen qonaq qatysýda, onyń 350 adamy alys jáne jaqyn shetelderdegi álemniń 39 elinen keldi. Bul - ǵylymi-shyǵarmashylyq jáne pedogogikalyq ziialylar ókilderi, biznes, sport, buqaralyq aqparat quraldary salalarynyń mamandary, memlekettik jáne qoǵamdyq uiymdardyń qyzmetkerleri. Quryltai delegattary men qonaqtarynyń 80 paiyzy mundai is-sharaǵa alǵash ret qatysýda.
Dúniejúzi qazaqtarynyń V Quryltaiynyń saltanatty ashylý rásimine Qazaqstan Respýblikasynyń Prezidenti N.Á. Nazarbaev, QR Parlamentiniń Senat jáne Májilis depýtattary, ministrlik pen vedomstvalar basshylary, túrli partiialardyń, qoǵamdyq qozǵalystardyń kóshbasshylary, Qazaqstandaǵy ulttyq-mádeni ortalyqtardyń basshylary keldi.
Jospar boiynsha, Quryltai aiasynda Ulttyq akademiialyq kitaphanada belgili dintanýshy-ǵalymnyń 100 jyldyǵyna arnalǵan «Halifa Altai jáne tarihtyń oralýy» atty halyqaralyq ǵylymi-tájiribelik konferentsiia ótedi.
Din isteri jáne azamattyq qoǵam, Bilim jáne ǵylym, Aqparat jáne kommýnikatsiialar, Mádeniet jáne sport, Densaýlyq saqtaý ministrlikteri Quryltaidyń sheteldik qonaqtarymen «dóńgelek ústel» otyrysyn ótkizedi.
Quryltai delegattary men qonaqtary «EKSPO-2017» halyqaralyq kórmesimen tanysady, etnoaýyldy aralaidy jáne «Astana Opera» memlekettik opera jáne balet teatrynda ulttyq mýzykamyzdyń altyn qoryna kirgen Evgenii Brýsilovskidiń «Qyz Jibek» operasyn tamashalaidy.
Dúniejúzi qazaqtarynyń quryltaiynyń baspasóz ortalyǵynda 150 otandyq jáne sheteldiń BAQ ókilderi aqparat taratýda.
1992 jyldan beri ótkizilip kele jatqan Quryltai dúniejúziniń túkpir-túkpirinde turatyn etnikalyq qazaqtardyń kezdesý orny ári biregei suqbat alańy bolyp tabylady.
