Qazaqstannyń memlekettik qaryzy álem boiynsha eń tómen. Bul týraly keshe Qytaiǵa memlekettik saparyn qorytyndylap, qazaqstandyq BAQ ókilderine suhbat bergen QR Prezidenti Nursultan Nazarbaev aitty, dep habarlaidy QazAqparat tilshisi.
«Búkil álem boiynsha bizdiń memlekettik qaryzymyz eń tómen. Amerikalyqtardyń qaryzy 14 trln dollarǵa teń. Bul ishki jalpy ónimnen de joǵary. Germaniia qaryzy jalpy ishki ónimniń 90, Italiiada - 120, Ispaniiada 100 paiyzdy quraidy. Al bizdiń qaryzymyz ne bári 13 mlrd dollar ǵana. Iaǵni, jalpy ishki ónimniń 10 paiyzynan da tómen», - dedi Nursultan Nazarbaev.
Osy oraida Memleket basshysy elimizdiń memlekettik qaryzy ulǵaiyp ketpeýin únemi jiti qadaǵalap otyratyndyǵyn aitty.
«Al bular (qytailyq kompaniialarmen birlesken jobalar) meniń ýaǵdalastyǵymnyń, jaqsy qarym-qatynasymnyń arqasynda oryn alyp jatyr. Biznesmenderge jaqsy jol ashyp berip otyrmyn. Olarǵa senedi, óitkeni memleketke senim artady. Bul jobalardyń barlyǵy da kommertsiialyq, biznes toptardyń arasynda júzege asyrylady», - dedi Elbasy.
Nursultan Nazarbaev Astanada jeńil relsti tramvai jobasyna ǵana alynatyn qaryz memlekettiki ekendigin ashyq aitty.
«Bul jer ústindegi metro desek te bolady. Muny salý memlekettiń mindettemesi. Óitkeni, infraqurylymyn salyp, tenikasyn eshkim satyp ala almaidy. Infraqurylymdy memleket salýy tiis», - dedi QR Prezidenti.
