Elbasy Nursultan Nazarbaev elordada ótip jatqan XII Astana ekonomikalyq forýmynda Qazaqstandy «Eki prezident» basqarady» degen pikirge qatysty óz oiyn aitty. Bul týraly baq.kz habarlady.
Plenarlyq sessiianyń moderatory, Euronews Shtefan Grobe Nursultan Nazarbaev sailaýdan keiin eldiń saiasi jaǵdaiyn qalai elestetinin surady.
«Men óz printsipimdi ustanamyn. Prezdient pen halyq bir-birin túsingen kezde memleket jetistikke jetedi. Ult kóshbasshysynyń baǵdarlamasy men ideialaryna halyq tolyqtai qoldaý kórsetýi tiis. Meniń tusymda solai boldy. Elmen tyǵyz jumys istedim. Táýelesizdik alǵannan beri bes sailaýǵa qatystym. Sonyń bárinde elektorattyń 85% tómen daýys jinaǵan emespin. Halyqpen osyndai túsinistiktiń arqasynda joǵary nátijelerge qol jetkizdik, - dedi Nazarbaev.
Elbasy sailaýǵa qatyssa, taǵy da jeńiske jetetine senimdi ekenin aitty.
«Men óz kandidatýramdy usynyp, sailaýda jeńiske jetetinime 100% senimdimin. Biraq jańa býyn, jańa komanda bilikke kelý kerek», - dedi ol.
Elbasy Qazaqstan uzaq merzimdi áleýmettik jáne ifraqurylymdy damytýǵa arnalǵan baǵdarlamalar qabyldaǵanyn aityp ótti.
«Kelesi prezident – «Qazaqstan-2050» baǵdarlamasyn jalǵystyrady, elimiz 30 damyǵan eldiń qataryna kirý kerek. Sol jumys istelýi tiis», - dedi Nazarbaev.
Sóz sońynda Elbasy moderatorǵa ázildep, Qazaqstandy eki prezident basqarady degenge qatysty pikir bildirdi.
«Men sizderge yńǵaisyzdyq týdyryp jatqanymdy bilemin: aldymen, «tuńǵysh prezident» sosyn «prezident» dep habarlaisyzdar. Alaida, Qazaqstanda mundai eki prezidenttik basqarý joq. Bir ǵana prezident bar jáne ol – eń bastysy», - dedi Nursultan Ábishuly.
Aita keteiik, AEF-tyń basty maqsaty – jahandyq úrdisterdi zertteý jáne Qazaqstan damýynyń praktikalyq saiasatyn jasaý úshin ekonomikalyq saiasat pen ǵylym salasynda tájiribe almasý alańyn qurý. Astana ekonomikalyq forýmy 11 jyldyń ishinde álemdik ekonomika men qarjy júiesin jetildirý jáne damytý máselelerin talqylaýǵa arnalǵan eń bedeldi halyqaralyq platformalardyń biri retinde mártebege ie boldy. Forýmǵa álemniń 150 elinen 50 000-ǵa jýyq delegattar, onyń ishinde 20-dan asa Nobel syilyǵynyń laýreattary jáne 30 joǵary dárejeli sheteldik saiasi qairatkerleri qatysyp úlgergen.
Bek TÓLEÝOV
Foto: Baýyrjan JÝASBAEV
