Búgin kúnniń ekinshi jartysynda Qazaqstan Prezidenti Nursultan Nazarbaev QHR Tóraǵasy Si Tszinpinmen jáne QHR Memlekettik keńesiniń premeri Li Ketsianmen ekijaqty kelissóz ótkizdi, dep habarlady Qytaidaǵy Ult.kz tilshisi QazAqparat agenttigine silteme jasap.
«Bir beldeý, bir jol» atty halyqaralyq yntymaqtastyq boiynsha joǵary deńgeidegi Forýmǵa qosh keldińizder. Jibek joly Ekonomikalyq beldeýi bastamasy Qazaqstanda usynylǵan. Ótken jyly Sizder «Úlken jiyrmalyq» kóshbasshylarynyń sammitine qatysý úshin Hanchjoý qalasyna keldińizder. Onda biz birqatar máselelerde túsinistikke qol jetkizip, óńirlik jáne halyqaralyq máseleler boiynsha tereńnen pikir almastyq. Bizdiń ýaǵdalastyǵymyz iske asyrylyp jatqanyn qýana aitqym keledi», - dedi Si Tszinpin.
Ol óndiristik qýat, saýda-sattyq, energetika, aýyl sharýashylyǵy jáne basqa da salalardaǵy eki eldiń yntymaqtastyǵy josparly damyp jatqanyn atap ótti.
Osy jyly biz Qytai men Qazaqstan arasynda diplomatiialyq qatynastar ornaýynyń 25 jyldyǵyn atap ótemiz. Osy jyldar ishinde elder arasynda strategiialyq sipattaǵy jan-jaqty bailanystar nyǵaidy, bul budan da joǵary deńgeige jetedi dep úmittenemin, - dedi kezdesýde Si Tszinpin.
Nursultan Nazarbaev Si Tszinpinge Forýmǵa shaqyrǵany úshin alǵys bildirdi.
«Forýmnyń ashylýynda sóilegen sózińiz óte mazmundy, áserli, kóptegen suraqtardyń jaýaby dese bolady. 2013 jyly Qazaqstanda siz antijahandyq ósim aiasynda álemde adamdar yntymaqtastyqtyń qalai damityny jaily kóptep suraq qoiatynyn aldyn ala sezgendei, jańa bastama jaily oiyńyzdy bildirdińiz. «Bir beldeý, bir jol» bastamasy óńirlik jáne jahandyq damýdyń jańa paradigmasy, yntymaqtastyqtyń jańa shemasyna ainaldy», - dedi Elbasy.
N. Nazarbaev Qazaqstan men Qytai yntymaqtastyǵyn úlgi tutarlyq dep atady.
«Basqa elder bizden úirenýine bolady. Búgin Jibek jolynyń ekonomikalyq beldeýi jumysyn bastap ta ketti, biyl elder arasyndaǵy taýar ainalymynyń ósimi 30 paiyzdy qurady», - dep atap ótti Prezident.
