Nursultan Nazarbaev Qytai Halyq Respýblikasy Memlekettik keńesiniń birinshi vitse-premeri Chjan Gaolimen kezdesti, - dep habarlaidy "Ult aqparat" Aqordaǵa silteme jasap.
Memleket basshysy kezdesýde QHR Memlekettik keńesiniń birinshi vitse-premerine sáttilik tilep, ekijaqty yntymaqtastyqtyń joǵary deńgeide ekenin atap ótti.
– Qazaqstan men Qytai arasynda seriktestiktiń erekshe modeli qalyptasqan. Biz energetikalyq jáne basqa da salalarda yntymaqtastyq ornatyp otyrmyz, – dedi Qazaqstan Prezidenti.
Nursultan Nazarbaev QHR tóraǵasy Si Tszinpinniń «Bir beldeý – bir jol» atty halyqaralyq forýmǵa shaqyrǵanyna alǵys bildirip, bul is-sharaǵa qatysýǵa daiyn ekenin jetkizdi.
– Aldymyzda bizdi kóptegen birlesken jumys kútip tur. «Bir beldeý – bir jol» forýmyna qatysý úshin Beijińge baratyn saparym barysynda biz «Nurly jol» jáne «Jibek joly ekonomikalyq beldeýi» baǵdarlamalaryn ushtastyrý joldaryn jan-jaqty talqylaimyz, – dedi Memleket basshysy.
Chjan Gaoli QHR tóraǵasy Si Tszinpinniń Qazaqstan Prezidentine joldaǵan sálemin jetkizip, Yntymaqtastyq jónindegi komitet otyrysy aiasynda jańa ýaǵdalastyqtar jasalǵanyn atap ótti.
– Qytai Halyq Respýblikasynyń tóraǵasy biylǵy maýsym aiynda «EKSPO-2017» halyqaralyq kórmesiniń ashylýyna jáne Shanhai yntymaqtastyq uiymynyń sammitine qatysý úshin Qazaqstanǵa kelýdi josparlap otyr. Sizdiń basshylyǵyńyzben Qazaqstanda ekonomikanyń qarqyndy damýy jalǵasýda, áleýmettik turaqtylyq bar ekeni baiqalady, halyqtyń ál-aýqaty jaqsaryp keledi. Halyqaralyq arenada da Qazaqstannyń bedeli artyp otyr, – dedi Chjan Gaoli.
QHR vitse-premeri Qazaqstanda júzege asyrylyp jatqan reformalarǵa qoldaý bildirip, Nursultan Nazarbaevtyń rýhani jańǵyrý jónindegi taiaýdaǵy bastamalarynyń mańyzdylyǵyna toqtalyp ótti.
Kezdesý sońynda Qazaqstan Prezidenti elimizdegi ózgeristerdiń iske asyrylýyna qoldaý kórsetkeni úshin QHR basshylyǵyna alǵys bildirip, saýda jáne ekonomika salasy boiynsha eki el arasyndaǵy bailanystar nyǵaia túsedi dep úmittenetinin jetkizdi.
