Qazaqstan Qyrǵyzstanmen aradaǵy barlyq máselelerdi sheshýge daiyn. Bul týraly búgin Aqordada elimizge resmi saparmen kelgen Qyrǵyzstan Prezidenti Sooronbai Jeenbekovpen keńeitilgen quramdaǵy kelissózder barysynda Qazaqstan Prezidenti Nursultan Nazarbaev aitty, dep habarlaidy Ult.kz tilshisi QazAqparat agenttigine silteme jasap.
«Osy 25 jyldyń ishinde eki eldiń táýelsizdigi, qarym-qatynasymyz odan ary nyǵaidy. 150 qujatqa qol qoiyldy. Mundai qujattyq baza, eki eldiń arasyndaǵy osyndai institýttsionaldy qatynas basqa elmen Qazaqstanda joq. Tek Qyrǵyzstanmen osynshama qujatqa, kelisimge qol qoiyldy. Eki eldiń arasynda bar máselelerdi sheship, artqa qaldyryp, bolashaqqa bet burýǵa múmkinshiligimiz bar. Biz, men ózim oǵan ábden daiynmyn», - dedi Memleket basshysy.
Sonymen qatar Qazaqstan Prezidenti eki eldiń arasyndaǵy saýda-ekonomikalyq bailanystarǵa toqtaldy.
«Ekijaqty qarym-qatynas jaiynda aitar bolsaq, aǵymdaǵy jyldyń 10 aiynda saýda-sattyq 13 paiyzǵa artty. Qazaqstan Qyrǵyzstannyń negizgi seriktesteriniń biri, negizgi investorlarynyń biri sanalady. Osy jyldardyń ishinde qyrǵyz ekonomikasyna shamamen 650 mln dollar salyndy, birneshe birlesken kásiporyn jumys istep tur. Qazaqstanda qyrǵyz biznesi men kapitaly salynǵan 700-den astam kásiporyn bar. Endigi ýaqytta eýraziialyq integratsiia jaǵdaiynda jumys isteimiz», - dedi Nursultan Nazarbaev.
Memleket basshysy qyrǵyz áriptesimen shaǵyn quramdaǵy kelissózder barysynda óńirlik saiasi máselelerdiń keń aýqymy qarastyrylǵandyǵyn atap ótti.
«Minskidegi sońǵy kezdesýden beri az ǵana ýaqyt ótti. Bizdiń Úkimetterimiz óte úlken tiimdi jumystardy júrgizip, sizderdi de, bizdi de tolǵandyrǵan máselelerdi sheshti», - dedi Elbasy.
