BUU-nyń damý baǵdarlamasynyń reitingine sáikes, Qazaqstan álemde 55-oryn ielenip, adami damý deńgeii joǵary memleketter tobyna endi. Bul týraly Elbasy Nursultan Nazarbaev Pavlodar oblysynyń jurtshylyǵymen ótken kezdesýde aitty. Kezdesýge eńbek sińirgen ardagerler, óndiristik kásiporyndardyń jumysshylary, agrarlyq sala ókilderi, jastar kóshbasshylary, sportshylar, qoǵamdyq uiymdar men etnomádeni birlestikter jetekshileri qatysty, dep habarlaidy "Ult aqparat" Aqordaǵa silteme jasap.
Elbasy táýelsizdik jyldarynda damýdyń ornyqty ekonomikalyq modeli jasalǵanyn atap ótti.
«Naryqtyq ekonomika úshin damýdyń jańa «lokomotivine» ainalǵan myqty kásipkerler toby paida boldy. Búginde elimizde 1 million 260 myńnan astam shaǵyn jáne orta biznes kásiporyndary bar», – dedi Nursultan Nazarbaev.
Memleket basshysy eldiń áleýmettik saladaǵy jetistikteriniń de mańyzdylyǵyn atap ótti.
«BUU-nyń damý baǵdarlamasynyń reitingine sáikes, Qazaqstan álemde 55-oryn ielenip, adami damý deńgeii joǵary memleketter tobyna endi», – dedi Qazaqstan Prezidenti.
Sondai-aq, Elbasy Qazaqstan ekonomikasynyń «indýstriialyq-ónerkásiptik tiregine» ainalǵan óńirdiń eleýli damý nátijelerine nazar aýdardy.
«Óńirdiń odan ári damýynyń irgeli indýstriialyq bazasyn quraǵan aýqymdy jobalar jemisti júzege asyryldy. Atap aitqanda, qýattylyǵy jylyna 250 myń tonna bolatyn, bastapqy aliýminii óndiriletin elektroliz zaýyty salyndy, ol Qazaqstandy tústi metallýrgiiadan jetekshi elder qataryna qosty. Bul mańyzdy jobanyń damýy barysynda «Qazenergokabel» aktsionerlik qoǵamynda aliýminii symdarynyń óndirisi iske qosyldy. Taǵy bir mańyzdy nysan – qýattylyǵy jylyna 30 myń tonna bolatyn hlor men kúidirgish soda shyǵarý jónindegi «Kaýstik» aktsionerlik qoǵamynyń zaýyty», – dedi Nursultan Nazarbaev.
Ult portaly
