Memleket basshysy Nursultan Nazarbaev Aqordada Túrkiia Respýblikasynyń prezidenti Redjep Taiyp Erdoǵandy qabyldady. Resmi sharadan keiin prezidentter ekijaqty kezdesý ótkizdi, dep xabarlaidy Ult.kz tilshisi QazAqparat agenttigine silteme jasap.
"25 jyldyń ishinde Qazaqstan men Túrkiia arasynda aǵaiynshylyq qarym-qatynastan basqa másele bolǵan joq. Sizdiń sońǵy saparyńyz kezinde biz ekonomika, ekijaqty qarym-qatynas jónindegi biraz másele boiynsha kelistik. Jasalyp jatqan jumystar kóp. Bizdiń óńirimizde óz problemamyz bar, Sizde de bar. Sonyń barlyǵyn keńinen talqylap aqyldasýǵa búgin múmkindigimiz bar. Siz ben Pýtinniń suraýymen Siriia máselesi boiynsha jumystar júrip jatyr. 14-inde (qyrkúiek - avt.) taǵy bir kezdesý bolady", - dep atap kórsetti Nursultan Nazarbaev.
Óz kezeginde Túrkiia basshysy qazaq xalqynyń, sonyń ishinde Prezident Nursultan Nazarbaevtyń aimaqtyq shielenisterdi sheshý jolyndaǵy eren eńbegin erekshe atap ótti.
"Aimaqtyq máselelerdi sheshýdegi Sizdiń, aqsaqalymyzdyń, jeke bastamalaryńyz úshin erekshe alǵysymdy bildiremin. 14-inde bolatyn Siriia máselesi boiynsha Astana kelissózderi óte mańyzdy. Biraz jumystar aiaqtaldy dep estigenmin. Endi, naqty bir nátijege kelý kerek. Qudai qalasa, osy qadamdardyń jemisin Astanada kóremiz. Osylaisha, Jeneva protsesi de jeńildei túsedi dep senemin", - dedi Erdoǵan.
