Memleket basshysy Islam yntymaqtastyǵy uiymynyń ǵylym jáne tehnologiialar jónindegi sammiti aiasynda Islam damý bankiniń prezidenti Bandar ben Muhammad Hadjarmen kezdesti, dep habarlaidy "Ult aqparat" Aqordaǵa silteme jasap.
Qazaqstan Prezidenti Astanada ótip jatqan Islam yntymaqtastyǵy uiymynyń ǵylym jáne tehnologiialar jónindegi birinshi sammitine qatysqany úshin Islam damý bankiniń prezidentine rizashylyq bildirdi.
– Islam damý bankimen yntymaqtastyǵymyz jyl saiyn nyǵaia túsýde. Búgingi sammit «EKSPO-2017» halyqaralyq kórmesiniń ótýimen tuspa-tus kelip otyr. Bul kórmeniń taqyryby – jańa energetika. Onda barlyq elderdiń osy saladaǵy jetistikteri kórsetildi, – dedi Nursultan Nazarbaev.
Memleket basshysy kórme jumysy aiaqtalǵan soń onyń ornynda Halyqaralyq qarjy ortalyǵy jumys isteitinin, onyń qyzmeti aǵylshyn quqyǵyna negizdeletinin atap ótti.
– Biz kóptegen damyǵan elderdiń osy saladaǵy qyzmetine taldaý jasap, bul ortalyqtyń jumysyn Dýbaidaǵy qarjy ortalyǵynyń úlgisi boiynsha qalyptastyrýdy uiǵardyq. Islam damý banki osy jumystarǵa tikelei atsalysady dep úmittenemin, – dedi Qazaqstan Prezidenti.
Islam damý bankiniń prezidenti qonaqjailyq kórsetkeni úshin Memleket basshysyna jáne Qazaqstan halqyna alǵys aitty.
– Biz osyndai aýqymdy is-sharaǵa qatysqanymyzǵa qýanyshtymyz. Bul – Islam yntymaqtastyǵy uiymynyń ǵylym jáne tehnologiialar salasyndaǵy alǵashqy sammiti. Osy mańyzdy sammitke qatysýǵa múmkindik jasaǵanyńyz úshin rizashylyq bildiremiz, – dedi Bandar ben Muhammad Hadjar.
Sondai-aq, Islam damý bankiniń prezidenti bul sammit Nursultan Nazarbaevtyń ǵylym men jańa tehnologiialardy damytýǵa baǵyttalǵan qyzmetiniń aiqyn kórinisi ekenin atap ótti.
– Bul Sizdiń bolashaq urpaqtyń damyǵan eldermen básekelesýge múmkindigin arttyrýǵa qosqan úlesińiz. Islam yntymaqtastyǵy uiymyna múshe elderdiń ǵylym jáne tehnologiialar jónindegi qoryn qurýǵa qoldaý kórsetkenińiz úshin zor alǵysymdy bildiremin, – dedi Bandar ben Muhammad Hadjar.
