Nursultan Nazarbaev Glencore International AG kompaniiasynyń basshylyǵymen kezdesti, dep habarlaidy "Ult aqparat" Elbasynyń resmi saityna silteme jasap.
Elbasy Glencore International AG kompaniiasynyń basshysy Aivan Glazenbergke Qazaqstannyń taý-ken ónerkásibin damytýǵa qosqan úlesi úshin rizashylyǵyn bildirdi. Qazaqstannyń Tuńǵysh Prezidenti negizgi investory Glencore International AG bolyp tabylatyn «Qazmyrysh» jaýapkershiligi shekteýli seriktestiginiń tiimdi jumysyn atap ótti.
– Jiyrma jylǵa jýyq ýaqyt tabysty jumys istegennen keiin siz kompaniia basshysy laýazymynan ketip jatyrsyz. Bizdiń tiimdi yntymaqtastyǵymyz memleket biýdjetine qomaqty kiris ákeldi. Osy ýaqyt ishinde kompaniianyń óndiristik kórsetkishteri aitarlyqtai ulǵaidy, – dedi Nursultan Nazarbaev.
Sondai-aq Elbasy «Qazmyrysh» kásiporny óńirdiń ekologiialyq jáne áleýmettik máselelerin sheshýge belsene atsalysyp júrgenine toqtaldy.
– Pandemiia saldarynan týyndaǵan qazirgi qiyn jaǵdaida halyqqa qoldaý kórsetip, jumys oryndaryn saqtaýdy jáne áleýmettik máselelerdi sheshýdi jalǵastyra berýdi suraimyz. Jalpy osy baǵytta sizderdiń kompaniialaryńyz elimiz boiynsha kóshbasshylardyń biri bolyp sanalady, – dedi Qazaqstannyń Tuńǵysh Prezidenti.
Óz kezeginde A.Glazenberg Nursultan Nazarbaevqa taý-ken salasy eńbekkerlerine kórsetken qoldaýy úshin, sondai-aq táýelsizdik jyldarynda elde qolaily investitsiialyq klimat qalyptastyrǵany úshin alǵysyn bildirdi.
– Qazaqstan – taý-ken salasyndaǵy investorlar úshin eń senimdi ári qaýipsiz elderdiń biri. Glencore jumys isteitin basqa elderden ereksheligi, Qazaqstanda investorlarǵa qatysty zańnama men salyq rejimi turaqty, saiasi rejim senimdi ári ornyqty. Chilide, Perýde salyq ózgeredi, Afrikada únemi bári qubylmaly, tipti Avstraliiada da ózgeris bolyp turady. Qazaqstanda túsinikti, qarapaiym ári ózgermeitin erejeler bar. Bul alańsyz jumys istep, investitsiiany arttyrýǵa múmkindik beredi, – dedi A.Glazenberg.
