Nursultan Nazarbaev Qazaqstanǵa resmi saparmen kelgen Germaniia Federativtik Respýblikasynyń Prezidenti Frank-Valter Shtainmaiermen kezdesti, - dep habarlaidy "Ult aqparat" Aqordaǵa silteme jasap.
Nursultan Nazarbaev F.-V.Shtainmaierdiń Germaniia Prezidenti retinde Qazaqstanǵa alǵashqy saparmen kelip otyrǵanyn atap ótip, oǵan «EKSPO-2017» kórmesin aralap kórýge qyzyǵýshylyq tanytqany úshin rizashylyq bildirdi.
– Men Sizdi elińizdiń Prezidenti laýazymyna sailanýyńyzben quttyqtaýdyń osyndai múmkindigi týyndaǵanyna qýanyshtymyn. Siz dúnie júzine belgili ári kópshilik qurmetteitin saiasatkersiz. Germaniia halqy ózińizdei bedeldi Prezidentke ie boldy. Biz bir-birimizdi kópten beri bilemiz. Sizben yntymaqtastyqta bolyp, júzdesý árdaiym kóńil qýantady. Siz syrtqy ister ministri laýazymynda bolǵan kezde biz aýqymdy túrli máselelerdi talqylaǵan edik, – dedi Nursultan Nazarbaev.
Qazaqstan Prezidenti Germaniia álemdegi eń iri ekonomikasy bar el ekenin aityp, elderimiz jaqsy áriptes bolyp otyrǵanyna toqtaldy.
– Qazir yntymaqtastyǵymyzdyń jańa baǵdarlamalary bar. Qazaqstan osy qarym-qatynastardy barlyq baǵyttar boiynsha damytýǵa múddeli. Sizdiń saparyńyz aiasynda Iskerlik keńes ótýde. Elderimizdiń biznes-qurylymdary arasynda 20-ǵa jýyq kelisimge qol qoiylady, – dedi Memleket basshysy.
Germaniia Federativtik Respýblikasynyń Prezidenti F.-V.Shtainmaier Nursultan Nazarbaevqa Qazaqstanǵa shaqyrǵany úshin búkil Germaniia delegatsiiasy atynan alǵys aitty.
– Sizge qonaqjailyq tanytyp, Germaniiaǵa jáne jeke ózime qatysty aitqan jyly lebizińiz úshin rizashylyǵymdy bildiremin. Prezident retinde sailanǵannan keiin men Qazaqstanǵa alǵash ret kelip otyrmyn. Osy saparymnyń ózindik ereksheligi de bar. Biyl bizdiń memleketter arasynda diplomatiialyq qarym-qatynastar ornaǵanyna 25 jyl tolyp otyr, – dedi F.-V.Shtainmaier.
Germaniia Prezidenti eki el arasyndaǵy yntymaqtastyq oń qarqyn alyp otyrǵanyna nazar aýdardy.
– Shirek ǵasyrda ekonomikadaǵy, mádeniettegi jáne saiasattaǵy ózara qarym-qatynasymyz nyǵaiyp, tereńdei tústi. Osy iskerlik qatynastardyń artqanynyń birden-bir kórsetkishi retinde Germaniia uiymdary men kompaniialarynyń «Astana EKSPO-2017» kórmesine belsendi túrde atsalysýyn aitýǵa bolady. Osy oraida, kórmedegi Germaniia kúniniń meniń saparymmen tuspa-tus kelgenine óte qýanyshtymyn, – dedi F.-V.Shtainmaier.
Germaniia Prezidenti bolashaqtyń energetikalyq máselesine arnalǵan halyqaralyq kórme taqyrybynyń ózektiligin de atap ótti.
