Nursultan Nazarbaev Finliandiia Respýblikasynyń Prezidenti Saýli Niinistiomen kezdesti, dep habarlaidy "Ult aqparat" Aqordaǵa silteme jasap.
Resmi kezdesý rásiminen keiin memleketter basshylary shaǵyn jáne keńeitilgen quramda kezdesýler ótkizdi.
Memleket basshysy Finliandiia Respýblikasynyń Prezidentine dástúrli qonaqjailyǵy úshin rizashylyq bildirip, eki eldiń óńirlik jáne halyqaralyq máselelerdi qarastyrýdaǵy ustanymdary men tásilderi birdei ekenin atap ótti.
– Finliandiia men Qazaqstan – senimdi seriktes retinde tanylǵan memleketter. Sizdiń elde jaqynda ǵana ótken AQSh Prezidenti Donald Tramp pen Resei Federatsiiasynyń Prezidenti Vladimir Pýtinniń mańyzdy kezdesýi – sonyń jarqyn mysaly. Qazaqstanda da osyndai is-sharalar, sonyń ishinde Siriia shielenisin retteý jónindegi kelissózder ótkizilip keledi. Bizde ártúrli máseleler talqylanady. Munyń bári bizdiń memleketterimizdiń barlyq eldermen jaqsy qarym-qatynas ustanyp otyrǵanynyń arqasynda bolyp otyr. Bizdiń elderimiz kórshi memlekettermen shieleniske urynǵan emes, – dedi Qazaqstan Prezidenti.
Nursultan Nazarbaev Sýomi eliniń Qazaqstannyń Soltústik Eýropadaǵy saýda-ekonomikalyq jáne investitsiialyq mańyzdy seriktesi sanalatynyn atap ótip, Finliandiianyń Ortalyq Aziia elderimen taýar ainalymynyń 90 paiyzy bizdiń elimizge tiesili ekenin aitty.
– Elderimizdiń yqpaldastyqty odan ári tereńdetý úshin áleýeti zor. Sondyqtan, úkimetaralyq komissiia otyrysy aiasynda energetika, kólik, aýyl sharýashylyǵy jáne bilim salalary boiynsha qurylǵan jumys toptarynyń qyzmetin jandandyryp, naqty jobalardy talqylaýǵa kirisý qajet, – dedi Memleket basshysy.
Nursultan Nazarbaev Finliandiianyń biznes ókilderimen ótken kezdesýdiń qorytyndylaryna arnaiy toqtalyp, biznes-forým barysynda qol qoiylǵan qujattardyń mańyzdylyǵyn atap ótti.
– Biz yntymaqtastyǵymyzdy tereńdetýge múmkindik beretin múlde jańa jobalardy qolǵa alýǵa ýaǵdalastyq. Qol jetkizgen ýaǵdalastyqtardy júzege asyrý isine baqylaý júrgizýdi úkimetterimizge tapsyrýdy usynamyn, – dedi Qazaqstan Prezidenti.
Finliandiia Respýblikasynyń Prezidenti Memleket basshysyna iltipat bildirip, sońǵy eki jaqty kezdesý Astanada tabysty ótken «EKSPO 2017» halyqaralyq kórmesi kezinde bolǵanyn atap kórsetti.
– Sodan beri bizdiń eki jaqty saýda-ekonomikalyq qatynastarymyz edáýir ilgeriledi. Sizdiń búgingi saparyńyz onyń ári qarai tereńdeýine septigin tigizedi dep senemin. Sizdiń álemde bolyp jatqan oqiǵalarǵa qatysty pikirińiz men úshin árqashan da qyzyqty. Búginde salmaqty pikirler men tereń paiym-parasat óte qajet, – dedi Saýli Niinistio.
Kezdesý sońynda taraptar aýyl sharýashylyǵy, «jasyl» qarjy, energetika, ǵylym jáne bilim, mádeni-gýmanitarlyq bailanystar salalaryndaǵy eki jaqty yntymaqtastyq máselelerin de talqylady.
