Memleket basshysy Eýraziialyq úkimetaralyq keńes múshelerimen kezdesti, dep habarlaidy "Ult aqparat" Aqordaǵa silteme jasap.
Kezdesýge Qazaqstan Respýblikasynyń Premer-Ministri B.Saǵyntaev, Armeniia Respýblikasynyń Premer-Ministri K.Karapetian, Belarýs Respýblikasynyń Premer-Ministri A.Kobiakov, Qyrǵyz Respýblikasynyń Premer-Ministri S.Jeenbekov, Resei Federatsiiasy Úkimetiniń tóraǵasy D.Medvedev, Eýraziialyq ekonomikalyq komissiia alqasynyń tóraǵasy T.Sarkisian qatysty.
Nursultan Nazarbaev Eýraziialyq úkimetaralyq keńes músheleriniń elordaǵa kelgenderine qýanyshty ekenin jetkizip, kezdesýdiń Astana qalasyndaǵy «EKSPO-2017» halyqaralyq kórmesimen tuspa-tus ótip otyrǵanyn aitty.
– Úkimetter basshylarynyń óz memleketiniń ulttyq pavilondaryna barýǵa, sondai-aq Qazaqstan men ózge elderdiń ekspozitsiialaryn aralap kórýge múmkindikteri bar. Eýraziialyq ekonomikalyq odaqtyń úshinshi jyl jumys istep jatqanyn atap ótken jón. Bul kezeń álemdegi jáne odaqqa múshe elderdiń ulttyq ekonomikasyndaǵy kúrdeli ahýaldarǵa bailanysty bolyp otyr. Sonymen qatar, ortaq naryq pen biryńǵai ekonomikalyq qurylym qurý basty faktor bolyp sanalady, – dedi Qazaqstan Prezidenti.
Memleket basshysy ekonomikanyń ósimi elder arasyndaǵy taýar ainalymynyń artyp, ózara qarym-qatynastardyń nyǵaiýyna tikelei bailanysty ekenin aitty.
– Biz osy ýaqyt ishinde durys baǵytta ilgerilei aldyq dep esepteimin. Qazir oryn alyp otyrǵan birqatar máselege qaramastan, Eýraziialyq ekonomikalyq odaqty nyǵaitýymyz qajet. Aldymyzda el ishindegi máselelerdi sheship, ózara qarym-qatynasymyzdy odan ári damyta túsý mindeti tur. Bul jumystaǵy negizgi róldi úkimetterimiz atqarady. Bul degenimiz – ekonomikalyq mindetterdi sheshý, memleketter arasyndaǵy ózara is-qimyl máselelerin retteý, – dedi Nursultan Nazarbaev.
Sońynda Qazaqstan Prezidenti keńestiń búgingi otyrysy arqyly uiymdy ári qarai damytýǵa mańyzdy úles qosylatynyn atap ótip, qatysýshylardyń jumysyna jemis tiledi.
