Qazaqstan Prezidenti Qaraǵandy oblysynyń ákimi Erlan Qoshanovty qabyldady, dep habarlaidy "Ult aqparat" Aqordaǵa silteme jasap.
Kezdesý barysynda Memleket basshysyna 2018 jyldyń qorytyndysy boiynsha oblystyń negizgi áleýmettik-ekonomikalyq kórsetkishteri men damýdyń aldaǵy perspektivalary jóninde baiandaldy.
Nursultan Nazarbaev osy óńirdiń mańyzy zor ekenin atap ótip, gazben qamtý máselesine, sondai-aq Temirtaý qalasynyń ekologiialyq jaǵdaiyna airyqsha toqtaldy.
Oblys ákimi Elbasyǵa Joldaýda aitylǵan tapsyrmalardy iske asyrý úshin qabyldanyp jatqan sharalar týraly málimdedi.
– Sizdiń eńbekaqy mólsherin kóterý jónindegi bastamańyzdy oblystaǵy barlyq uiymdar qoldady. Bul biylǵy 1 qańtardan bastap 220 myńnan astam jumysshynyń jalaqysyn 14 paiyzǵa deiin ósirýge múmkindik berdi. Sonymen qatar, negizgi kommýnaldyq qyzmetterge qatysty tarifter 5-11 paiyzǵa tómendeitin bolady, – dedi E.Qoshanov.
Sońynda Elbasy óńirdi odan ári órkendetý, sonyń ishinde Qaraǵandy qalasynyń qurylysyna qatysty máseleler jóninde birqatar tapsyrma berdi.
