Memleket basshysy «Equus: Jylqy tarihy» atty derekti filmniń kórsetilimin tamashalady, dep habarlaidy "Ult aqparat" Aqordaǵa silteme jasap.
Qazaqstan Prezidenti «Equus: Jylqy tarihy» atty derekti trilogiianyń ekinshi bóliminiń tanystyrylý rásimine bardy. Filmdi rejisser, antropolog Naiobi Tompson men qazaqstandyq prodiýser, zertteýshi Nurbol Baimuhanov jetekshilik etetin kanadalyq top elimizdiń aýmaǵynda túsirgen. Bul filmge quramyna otandyq sýretshiler, ártister, kaskaderler, dýblerler men bezendirýshiler engizilgen shyǵarmashylyq top tartylyp, amerikalyq kompozitor Darren Fangtiń mýzykasy paidalanyldy.
Derekti filmde tirshiligi jylqynyń qolǵa úiretilýine bailanysty óristegen Qazaqstan aýmaǵyndaǵy ejelgi mádenietter kezeńderi ǵylymi-zertteý jumystary men zamanaýi aqparattyq tehnologiia negizinde qaita jańǵyrtylǵan. Bul úderis adamzat kommýnikatsiiasyna qatysty jańa júieniń qalyptasýyn aiqyndap, kóshi-qonnyń jandanýyna jáne ejelgi memleketterdiń paida bolýyna jol ashty.
Derekti trilogiia 2019 jylǵy naýryzda 50 eldiń, sonyń ishinde Kanadanyń (CBC), AQSh-tyń (PBS), Germaniianyń (ZDF), Frantsiianyń (ARTE), Daniianyń (DR) jáne Qazaqstanyń («Qazaqstan» RTRK) ulttyq telearnalarynda kórsetiledi dep josparlanyp otyr.
Sonymen qatar, Nursultan Nazarbaev Aqparat jáne kommýnikatsiialar ministrliginiń jańǵyrtylǵan Ortalyq kommýnikatsiialar qyzmeti baspasóz ortalyǵynyń jumysymen tanysty. Bul ortalyq «Qazmedia ortalyǵy» tehnologiialyq keshenimen tolyqtai biriktirilgen ári sońǵy úlgidegi zamanaýi quraldarmen jabdyqtalǵan kópfýnktsiialy media alań sanalady.
